Idup begulai manah, pesan niang Awang Raweng sebedau ngapuska seput

KUCHING: Idup begulai manah enggau diri menyadi sereta anak uchu. Nya mih pesan ke penudi endar Datuk Sarjan (B) Awang Raweng ngagai bala anak iya sebedau ngapuska sebut.

Doris Awang, 63, siku ari anak indu niang Awang Raweng madahka pesan ke penudi endar apai iya nya dipegai sida menyadi belama.

“Nadai mayuh pesan ti ditinggalka iya ngagai kami. Apai semina mesan semua kami sebilik ngambika begulai manah enggau pangan diri.

“Apai mega ngarapka kami menyadi mujur ba semua pengawa ke dikereja kami,” ku iya lebuh dikerandau pengudah nguburka niang ba Pendam Bujang Berani ditu kemari.

Doris ti enda ngetatka penyinu ati iya mega meri terima kasih ngagai perintah nengeri, raban veteran enggau semua ke bekaul ti udah nentuka pengelanchar pengawa nguburka niang apai sida.

Sinu ati enggau bantu enggau akun ke diberi ngagai niang apai iya, Doris madahka pemanah budi nya enda ulih dibalas sida sebilik.

“Terima kasih ngagai semua ti udah bebendar gawa ngaduka pengawa tu ngagai apai kami.

“Kami enda ulih malas budi kita lalu semina Petara aja ke ulih malas budi kita semua,” ku iya.

Doris ke mega siku ari anak niang Awang Raweng asil ari kedua kali bebini enggau Ipah Mawing. Siku agi anak asil ari begulai enggau bini lumur dua nya, iya nya Punai tang udah midang.

Keterubah iya bebini jadi enggau Jinap Minggu, ngadaka siku anak lelaki ke benama Maling ke diatu beumur 72 taun.

Ke penudi endar iya jadi Sema Nuli, ngadaka enam iku anak iya nya Menaul, 60, Kenyalang (udah midang dua taun ke udah), Douglas, 53, Panggau, 52, Duke (udah midang) enggau Lily, 50.