Niang Awang udah dikubur ba Pendam Bujang Berani enggau penuh adat basa

KUCHING: Sinu asai ati, baka nya mih gaya ke nyadi ba pengawa nguburka niang Datuk Sarjan (B) Awang Raweng ba Pendam Bujang Berani ditu kemari.

Niang udah mujur dikuburka urung pukul 11.45 pagi enggau penuh basa adat soldadu.

Lungun ke mai bangkai niang penerima Pingat George Cross, gela kedua tetinggi ari United Kingdom nya sisan raban soldadu ari baruh pegai Divisyen.

Datai ba Pendam Bujang Berani,’Last Post’ lalu disepu ditangkanka enggau ‘Rouse’ tauka ‘Paulan Fajar’ dipejalaika kena ngingat enggau meri basa ngagai niang.

Udah ditangkanka enggau pengawa nyuaka menira Jalur Gemilang ari Sapit Kepala Menteri Datuk Amar Douglas Uggah Embas,ngarika perintah nengeri ngagai anak niang, Pangau Awang.

Udah nya Panglima Medan Timur Soldadu Darat, Leftenan Jeneral Datuk Mohd Zakaria Yadi nyuaka menira Angkatan Tentera Malaysia (ATM) ngagai anak niang, Doris Awang.

Pengudah lungun ditama ngagai lubang, Uggah sekali agi ngarika perintah nengeri ngengkahka bungai ba pendam niang, ditangkanka Sekretari Perintah Nengeri Datuk Amar Jaul Samion.

Bela enggau ngengkahka bungai ba pendam niang, Leftenan Jeneral Zakaria ngarika ATM, Kapten Raban Penyanding Penemu Ngetanka Menua Komisioner Tinggi British, Simon Hindmarsh ngarika Bristih enggau Komisioner Polis Sarawak, Datuk Aidi Ismail.

Duluarinya,KepalaMenteri Datuk Patinggi Abang Johari Tun Openg enggau sekeda menteri kabinet nengeri ke bukai bela bisi meri basa ke penudi endar ngagai niang ba Dewan Suarah Kuching.

Diada dalam taun 1929 di Nanga Skrang, Sri Aman, Awang Raweng midang maya beumur 91 taun kena Hari Lima nyin tadi ba rumah iya di Jalai Padri, Sri Aman ketegal sakit.

Diberi gela Bujang Berani,

niang mega diberi gela Panglima Setia Bintang Sarawakari perintah Sarawak ba taun 2018 enggau Pingat Jasa Malaysia ba taun 2011.

Maya ke agi idup, niang udah gawa nyadi Raban Iban Tracker begulai enggau Raban Rejimen Kampung Worcestershire & Sherwood lalu kala ngelaban urung 50 kominis ba kampung Kluang, Johor kediri ketegal nyelamatka soldadu British ke bakal.

— Gambar Chimon Upon NGULU PENGAWA NGUBUR: Uggah (duduk tengah) lebuh ke ngulu pengawa nguburka niang Awang Raweng ba pendam Bujang Berani. Sama bisi dipeda dia, Hindmarsh (duduk ari kiba), Jaul, Zakaria enggau Aidi.

— Gambar Chimon Upon BASA: Anak tuai niang Awang Raweng, Maling mai gambar apai iya ba pengawa nguburka niang ti penuh enggau adat soldadu ba pendam Bujang Berani kemari.

— Gambar Muhammad Rais Sanusi DIKEINGATKA BELAMA: Awang Raweng dikeingatka belama.