Sekeda kandang menua dalam Bagi Menua deka napi penanggul bekal ai, 23 Sept tu
SIBU: Berindik ari pengawa ngaduka ‘interconnections’ ti deka dipejalaika raban kunteriktor Pan Borneo kena Hari Tiga (23 September) minggu tu, peranak ti diau besemak enggau Projek Jalai Besai Pan Borneo deka napi penanggul bekal ai pengelama 8 jam dalam kandang sehari nya.
Nitih ku Direktor Opis Bekal Ai Menua Pesisir (JBALB) Chang Kuet Shian, palan ti deka tekeruga laban pengawa tu iya nya nyengkaum sekeda endur ba KJD (Batu 4-Batu 16), Pakan (enda nyengkaum kandang pasar), Lemayong, Pasar Bintangor, Sungai Sian, Sungai Selidap, Bukit Papit enggau kandang Lebaan dalam Bagi Menua Sarikei.
Ku iya, tu kena meri awak ngagai semua kereja ‘interconnections’ iya nya pengawa nampung paip ke baru bansa 500mm HDPE Renggat Kedua enggau 500mm DICL Renggat Ketiga, berengkah ari Jalai Bulat nyentuk Simpang KJD.
“Kami udah bejalaika pengawa mansik ba palan nya lalu urung 53 buah rumah panjai deka tekeruga dalam tiga kategori iya nya ‘high impact, ‘medium impact’ enggau ‘low impact’.
“Nya alai, raban JBALB Bagi Menua Sarikei enggau raban kunteriktor Pan Borneo deka nyendiaka 9 buah tangki bekal ai sereta deka dianjung nitihka ripih ngagai semua palan ti tekeruga ketegal pengawa interconnections nya,” ku iya lebuh belicha ba pengawa aum media ba Opis Pelilih Menua Pesisir Sibu (SRDC) ditu, pagi kemari.
Nangkanka tu ku Chang, proses pengawa tu beguna timpuh pengelama 8 jam berengkah ari pukul 5 lemai sereta dipelabaka tembu urung pukul 1 pagi (24 September).
Taja pia ku iya, lebuh paip tu ila agi puang, tu deka begunaka timpuh kena nikika peneras ai lalu tau ngujungka timpuh bekal ai nya tekeruga deka nyadi panjai agi.
“Raban kami melabaka penanggul bekal ai deka nyadi ngelui timpuh ari 8 jam ba sekeda palan ke jauh agi.
“Nya alai, kami melabaka palan ti balat tekeruga deka napi penanggul peneras ai ti baruh iya nya urung pengelama 9 hari, lalu 5 hari ungkup endur ti tengan tekeruga.
“Tang kami deka nguji enggau naka ulih kena ngurangka empas tu ngagai peranak ba bagi menua nya lalu nganjung lori tangki ai nitihka ripih ngagai palan ti tekeruga,” ku iya baru.
Berindik ari nya, Chairman SRDC Sempurai Petrus Ngelai madahka raban iya deka matau pekara tu kena nentuka pengawa nya bejalai enggau lanchar sereta semua rumah panjai ti tekeruga deka dibekalka ai tangki nitihka ripih.
Nambahka tu ku Chang, pengawa interconnections nya deka dilanjarka ngagai hari ke bukai enti gaya hari enda tentu ngemendarka pengawa tu dipejalai nitihka perambu.
Semua kereja tu ku iya, enda ulih diseliah sereta tu ungkupka pengelanchar pengawa ngaga Jalai Besai Pan Borneo enggau ngangkatmanahka sistem bekal ai ke manah agi.
Penerang ke silik agi tauka bekaul enggau peminta bekal ai, peranak rumah panjai ti tekeruga laban pengawa tu tau betelefon ngagai JBALB Bagi Menua Sarikei ba lumur 085-657980/990 (jam opis) tauka ‘whatsapp’ aja ngagai Injinir Ai Bagi Menua 0168087705 (DWE), Penulung Injinir Ai (ADWE) 01112029883 enggau Penulung Injinir 019-4895815.
Sama bisi ba pengawa tu kemari iya nya Injinir Bagi Menua Sarikei Chieng Ghin Wei, Sapit Chairman SRDC Wong Ching Yong enggau sekeda raban Tuai Rumah.