Ex-ADUN Kedup, Frederick Bayoi udah midang kemari
KUCHING: Ex-Kaban Kunsil Nengeri (ADUN) Kedup, Datuk Frederick Bayoi Manggie, 77 taun kemari udah nadai ba rumah sida di Serian.
Bini niang, Datin Diana Bernadette, 42 taun lebuh ditelefon ngenataika penyinu ati laban baru aja merambu deka ngenyit ngintu pengada laki iya kemari.
“Iya midang urung pukul 8 pagi (kemari). Sinu asai ati laban aku bisi utai kelalai ba hari pengada iya sehari tu (kemari).
“Tadi baru aja madah ngagai indai aku, deka ke pasar meli kek, terus ngagai atas lalu meda iya nyau udah nadai,” ku iya madah ngagai Utusan Borneo.
Sebedau tu, niang suah sakit enggau kepenudi iya dipasuk ba sebuah sepital peribit ditu kena 19 nyentuk 22 Ogos beperubat.
Taja pia, kebuah pemidang Bayoi bedau ditemu tang siku lutur udah ditelefon ngambi bejalaika pengawa pansik ngagai iya lalu ngenukuka iya udah nadai.
Duta Khas Menteri Besai ke Asia Timur (Jepun, Korea Selatan, Taiwan), Dato Sri Richard Riot Jaem iya nya temuai keterubah ngabas ngagai rumah sida niang Bayoi tumu pagi kemari.
Riot nengah laman ‘Facebook’ iya mandangka pemidang iya endang diasai amat ungkup Kunsil Nengeri (DUN) Tarat enggau Kedup pengudah meri servis pengelama 5 penggal nyadi pengari rayat. Pemanah ati iya seruran deka dikenang.
Ex-ADUN nya mega udah bejalaika servis enggau Parti Pesaka Bumiputera Bersatu (PBB) pengelama 33 taun sebedau ningkilka diri kena 14 Januari 2016 laban nama iya enda dichalun ba kerusi Bukit Semuja.
Bayoi meri servis nyadi ADUN Kedup pengelama tiga penggal tauka 15 taun berengkah 1996 nyentuk 2011 pengudah dua penggal nyadi ADUN Tarat.
Bangkai niang deka dikuburka ba Pendam Kristian SDA, Air Manis di Serian urung pukul 10 pagi kena Hari Tiga (23 September) tu.