Pemidang niang Datuk Frederick Bayoi berasai ba rayat Serian

KUCHING: Niang Datuk Frederick Bayoi Manggie siku ketuai ti semampai dikenang lalu pemidang iya endang berasai ba rayat di Serian.

Kaban Kunsil Nengeri (ADUN), Bukit Semuja, John Ilus madahka iya udah betemu enggau ketuai nya sebedau Atur Nagang Pemindah (PKP) diteritka mai makai tengahari begulai.

“Gaya iya dipeda baka ke lemi, tang seruran nyebut iya nyukung penuh ketuai Sarawak diatu enggau nengeri tu enda patut labuh ngagai orang ke salah,” ku iya lebuh dikerandau kemari.

Pia mega, sebedau penyereta John ba dunya politik diatu...niang udah mayuh meri tunjuk ajar enggau sukung iya.

Niang Bayoi udah meri servis ngagai rayat di Serian pengelama lima penggal lalu ditemu udah nadai kemari ti sama enggau hari pengada iya ke-77 taun.

“Ba aku empu endang amat sinu, iya baka apai enggau kaban, tu pemidang ti amat diasai rayat di Serian.

Ngarapka sida niang sebilik ulih nerima pemidang iya.

“Mayuh udah iya meri sukung ngagai aku enggau meri basa sereta nyadi pengari ti pemadu lama meri servis,” ku iya nambah.

Bini niang, Datin Diana Bernadette, 42 taun lebuh dikerandau mega ngenataika penyinu ati laban baru aja pelin deka ngintu pengada laki iya.

Iya ditemu nadai urung pukul 8 pagi kemari ba rumah iya di Serian ke mega kaban Parti Pesaka Bumiputera Bersatu (PBB) pengelama 33 taun sebedau ningkilka pangku pengawa kena 14 Januari 2016 laban nama iya ti nadai dichalun ba kerusi Bukit Semuja.

Bayoi bejalaika tanggungpengawa meri servis nyadi ADUN Kedup pengelama tiga penggal tauka 15 taun berengkah 1996 nyentuk 2011 pengudah dua penggal nyadi ADUN Tarat.

Bangkai niang deka dikuburka ba Pendam Kristian SDA, Air Manis di Serian urung pukul 10 pagi, Hari Tiga (23 September) tu.