20 iku peranak Rumah Elly Banggan ngulu ‘Program Keluarga Sejahtera’ Kemas
SRI AMAN: Bisi 20 iku peranak ari Rumah Elly Banggan, Kampung Sunga Bakong, Lingga Sri Aman udah ngulu ‘Program Keluarga Sejahtera’ ti diatur Opis Pemansang Raban Bansa (KEMAS) Bagi Menua Sri Aman ditu pagi, ensana.
Pemesai Opis Pemansang Raban Bansa (KEMAS) Bagi Menua Sri Aman, Kelvin Lambai madah, program nya siti ari program ninting bulan ti diatur opis tu ba rumah panjai nya.
Nitih ku iya, program ti diatur iya nya program siri kedua ungkup taun tu enggau ke alai program siri keterubah iya nya ‘Program Kembara Ilmu’ ti udah diatur ba Rumah Kampung Melayu Bakong, Lingga Sri Aman ke mungkur aktiviti meresi Tabika KEMAS Kampung Melayu Bakong sebedau tu.
Ku iya, pengawa ngatur ‘Program Kesejahteraan Keluarga’ ba rumah panjai tu mekuh ngagai konsep tauka bekunsi penemu enggau komuniti genturung pendiau nya nengah chara enggau baka ni ngemeranka gaya idup ti bepengerai dalam pengidup besesehari sida ke alai diatu komuniti benung napi ubah gaya pengidup nengah chara ‘norma’ baru berindik ari menua dituntung pandemik COVID-19.
Dalam napi gaya nya ku Kelvin, komuniti mesti neruska pengidup sida nengah chara idup ti baru enggau seruran ngemeranka tikas pemeresi diri enggau diri sebilik sereta nentuka diri empu enggau diri sebilik ba gaya ti likun.
“Anang enda ingat mega, komuniti ngelingi kitai mega mesti ngemeranka pekara ke sama enggau pengidup kitai kemaya hari tu endang amat bebida sebedau COVID-19 nyadi ti diatu udah nyadi penyakit ti tau nabanka nyawa ngagai mensia di dunya,” ku iya maya nutup rasmi program nya.
Kelimpah enggau nya, Pemesai Pelajar Ngelakuka Pengerai enggau Opis Pengerai Bagi Menua Sri Aman, Zaifa Johari mega nerangka raban iya benung chakah bejalaika mayuh macham chara nengah bemacham ejensi perintah di Sri Aman kena mantu ngelakuka ‘Ngemeranka Gaya Idup Baru’ pengudah COVID-19.
“Kami benung chakah bejalaika mayuh macham kolaborasyen begulai enggau mayuh bengkah ejensi di Sri Aman nyengkaum Opis KEMAS empu dalam juluk raban kami deka bekunsi enggau komuniti nengah ngemeranka gaya idup baru pengudah COVID-19,” ku iya nerang.
Taja pan kes COVID-19 ba tikas ti manah, komuniti kitai enda tau ilap laban kes nya tau niki ngenyit.
“Ke pemadu beguna diatu, semua raban patut bekerejasama nengah ngemeranka gaya pengidup ti baru enggau seruran nyaga pengelikun diri enggau diri sebilik enda ngira dini alai kita diau sekalika ba rumah tauka ba palan mensia mayuh,” ku iya nerang enggau silik.
Nangkanka nya, program meri Licha Pengerai enggau Kuiz Pengerai mega bisi diatur.
Sama bisi datai ba program nya, Koordinator Pemansang Pengelandik (PIKEM), Opis KEMAS Bagi Menua Sri Aman, Rosani Ham, Koordinator Pemansang Insan, Musa Haadi enggau Koordinator Pelajar Tumu Nembiak Mit, KEMAS Sri Aman, Wan Habeeb Wan Mohamad sereta pengereja pengawa Opis KEMAS Bagi Menua Sri Aman ke bukai.