Karim: Anang bebatak asur enggau barang bagi pengereja pengawa
KUCHING: Ketuai opis enggau ketuai seksyen ari baruh Opis Menteri Nembiak, Lumba enggau Main (KBS) dilalau anang bebatak asur enggau barang bagi pengereja pengawa ti salah ngereja pengawa makai suap.
Menteri Nembiak, Lumba enggau Main, Datuk Abdul Karim Hamzah madah, sida mesti terit enda ngira pangkat, penuduk enggau status pekereja nya.
Ku iya nyemetak, tetiap pengawa makai suap ti nyadi ba dalam Opis Menteri mesti diripot ngagai raban pemesai tetinggi enggau opis bekuasa ke bekaul.
“Aku pechaya ngemeranka budaya integriti ba raban pengereja pengawa iya nya pekara pemadu dikemerat laban tu tiang dalam meri servis ti bekualiti ngagai komuniti enggau raban pengatur pengawa enggau Opis Menteri.
“Sekalika nemu tauka enda, ulah ti lurus, betanggungpengawa enggau integriti kebendar nyadi pengukur intrinsik ti nyadi penyungkak enggau kuing pemansang ekonomi,” ku iya maya bejaku ba pengawa bejadika Hari Integriti enggau ngemunka ‘Bengkel Pelan Anti-Rasuah Organisasi KBS Tahun 2020’ ditu, kemari.
Ambika chunto ba pengawa dagang, Abdul Karim madah, siku pedagang ti lurus enggau betanggungpengawa deka bulih pengarap ari penguna ti meli barang ke dijual enggau sida deka terus meli ari pejual nya.
“Pia mega enggau kitai ke gawa perintah, nengah ulah ti lurus, betanggungpengawa sereta tinggi integriti, kitai enda mudah deka tepejuh dalam isu pengawa ke enda lurus enggau makai suap ari raban luar.
“Aku pechaya nyema pengawa lurus dibai ba sektor perintah nyadi lurus mih jalai nya nyapai juluk menua, tang nyema enda lurus deka napi penanggul mih jalai nya,” ku iya.
Nya alai, ku iya baru, beguna amat ngagai pengereja pengawa perintah nengeri tu ngembuan pengeransing meretika pangku pengawa enggau ngemeranka ulah integriti ti tinggi kena nyapai juluk pemansang menua ti tegap enggau mujur.
Ba awak nya, Abdul Karim ke mega Menteri Dagang Temuai, Seni enggau Main Asal madah, KBS deka ngatur woksyop QACP di Hotel Waterfront ditu, berengkah 23 ngagai 25 September nyadika juluk bekunsi penemu ngagai pengereja pengawa sentang pelin nya ungkup timpuh 2015-2025 ti patut dikemeran semua sereta konsisten.
Sama bisi datai ba pengawa nya Menteri Muda Nembiak, Lumba enggau Main, Datuk Snowdan Lawan; Pemangku Sekretari Mendam KBS Sarawak, Nancy Jolhi enggau temuai ti dipebasa ke bukai.