JPBNS: Dua kes baru positif COVID-19 di Sarawak kemari

KUCHING: Dua kes positif COVID-19 baru ti bekaul enngau siku pengereja pengawa opis perintah di Kuching enggau siku eksekutif teknikal sebuah kompeni minyak enggau gis ti bepalan di Miri diripotka di Sarawak, kemari.

Komiti Mutarka Penusah Ngenyit Nengeri Sarawak (JPBNS) nengah penerang berita madahka,tu nyadika penyampau semua kes positif COVID-19 ba Sarawak nambah nyadi 1,055 kes.

“Siti kes baru di Kuching iya nya siku lelakai peranak menua tu, mega siku pengereja pengawa opis perintah ti gawa ba palan kereja ti sama enggau bisi kontak semak enggau kes 1,051 (Kluster Besi).

“Kes udah diperesa nengah aktiviti nyidi kontak semak ngagai kes positif COVID-19 kena 19 November 2020 sereta ditemu positif sehari tu (kemari),” ku JPBNS nengah penerang berita, kemari.

Nitihku JPBNS, kes udah dipasuk sereta diperubatka ba wad kediri ba Sepital Besai Sarawak (HUS).

“Kes agi dipansik sereta pengawa nyidi kontak serumah enggau kontak sosial kes tu benung chakah dipejalaika enggau kes tu bisi kaul enggau Kluster Besi,” ku JPBNS.

Siti agi kes baru diripotka di Miri iya nya seiku lelaki emnau tu ti nyadi eksekutif teknikal sebuah kompeni minyak enggau gis ti bepalan di Miri.

Ku JPBNS, kes tu ditemu nengah pengawa meresa aktif ti dipejalaika Opis Pengerai Bagi Menua Miri ba beberapa endur gawa ba Mengeri Besai Miri kenyau pun bulan November 2020.

“Kes tu mega nadai ngayanka seberang tanda rampit COVID-19 sereta nadai sejarah bejali ke luar menuya tauka ngelawa kandang endur bisi risiko kena rampit di dalam menua dalam timpuh tiga bulan ke udah.

“Kes udah dipasukka ba wad kediri Sepital Miri ngambika diperubatka,” ku JPBNS.

Lalu kes nya agi dipansik sereta pengawa nyidi kontak serumah, endur kereja enggau kontak sosial kes tu beung chakah dipejalaika sereta kes dikategori nyadi kes berampit dalam menua tu.

Berebak enggau tu JPBNS madahka bisi enam kluster ti agi aktif iya nya Kluster Besi, Kluster Jalan Abell, Kluster Baki, Kluster Seladah, Kluster Greenhill enggau Kluster Wisma Saberkas.

Kelimpah ari nya, JPBNS madah, bisi semilan kes baru udah gerai sereta dikemendarka pansut ari HUs (tujuh kes) enggau Sepital Miri (dua kes).

“Sehari tu (kemari) bisi lapan PUI baru diripotka sereta nadai PUI nganti pemutus makmal,” ku JPBNS.