MPC Sarawak nyendiaka mayuh inisiatif kena nyungkak servis sektor perintah, peribit

KUCHING: Perbadanan Produktiviti Malaysia (MPC) Sarawak nyendiaka mayuh inisiatif kena ngangkatka agi penyikar sistem nyendiaka servis sektor perintah enggau peribit ari baruh program ‘Sarawak Productive’.

Ketua Pengarah MPC, Datuk Abdul Latif Abu Seman madahka, entara program ti disediaka baka mansik enggau ngemanahka agi polisi state regulatory nengah program pemansang regulatory good practice sereta ‘online business virtual advisory services’ (BVAS).

Nambahka nya ku iya, nyendiaka latih nengah ‘webinars’ ngambika ulih berandauka chara kena betapi enggau gaya pengudah COVID-19 enggau program transformasyen ‘Business Excellence’ ungkup organisasyen.

“Inisiatif tu tuju iya kena nyadika Sarawak setipak enggau industri teknologi 4.0, dagang enggau industri impak-tinggi sereta ngangkatka produktiviti nengeri ngagai renggat ti lebih tinggi,” ku iya.

Abdul Latif mansutka pekara nya ba jaku pengelalu pengerami bejadi Sarawak Productive #MyMudah ti diatur MPC Sarawak ngena chara virtual, kemari.

Pengerami tauka #MyMudah nya dipenyadi Sapit Kepala Menteri ti mega Menteri Dagang Antarabansa enggau Industri, Terminal Industri enggau Pemansang Orang Dagang, Datuk Amar

Awang Tengah Ali Hasan ti nyadika Kepala Menteri, Datuk Patinggi Abang Johari tun Openg.

Ngenang bekaul enggau MyMudah, Abdul Latif madah sida iya bisi ngatur MyMudah ‘Round Table Discussion’ (RTD) serata menua nengah platform digital kena nambahka penyedar orang mayuh pasal program MyMudah.

Industri enggau pengempu dagang betapi enggau penusah maya bejalaika dagang ketegal tating penusah ti suah ditapi lalu sida diperansang mantaika penusah enggau isu nengah portal Unified Public Consultation (UPC), ku iya.

Ku iya, isu ke diterima nengah UPC deka dipansik MPC ngena chara nempa kaul enggau industri sereta orang ti nyaga industri kena meri penemu pasal chara pemadu engkeman kena mutarka penanggul.

“Naka 31 Oktober 2020 lebih ari 300 isu direjista nengah portal UPC. Naka ke diatu, 4 sesi online RTD udah dipejalaika di Sarawak ti mungkur 40 pesereta ti nyengkaum ari 15 gerempung enggau komuniti dagang.

“Aku arap bendar MyMudah ulih mantu orang dagang di Sarawak dalam betapi isu nyaga enggau ngemata kena ngemuntangka sida bejalaika dagang.

“Aku meransang semua pesereta ngambi peluang tu bekunsika penanggul dagang enggau bekunsi inisiatif tu enggau kaban gerempung,” ku iya.