Lebih 200 iku ukui diberi vaksin anti rabies di Sibu
SIBU: Lebih ari 200 iku ukui diberi vaksin dalam pengawa nagang pengelekai kena rampit igi penyakit rabies ti udah munuh 27 iku kenyau ari igi penyakit nya ditukuka di Sarawak kena 31 Julai 2017.
Enggau kerejasama entara Opis Servis Vaterinar Sarawak (DVSS) enggau Komiti Pemansang enggau Pengelikun Genturung Pendiau (JKKK) Sg Sadit sereta JKKK Tanjung Maling ba kampung Engkilo, pengempu ukui ba genturung pendiau nya udah lengkas nyambut enggau manah kimpin nya.
Chairman JKKK Sg Sadit Wong ung madah, vaksinasyen berengkah diberi pukul 9 pagi nyentukka 3 lemai.
Ku Wong madah, komuniti enggau DVSS deka ngatur mayuh agi servis bansa nya ditu.
Berindik ari vaksinasyen ba palan nya kilah ensana, kimpin bejalai kin kitu diteruska ngagai SJKC Ting Sing ba Sungai Bidut kemari ti udah meri servis ke sebaka ngagai pengempu ukui di kandang menua nya.
Iya madahka diri ba palan nya kemari kena matau program nya beguai enggau Kapitan Fung Tat Shen, Kapitan Lee Hui Shin enggau Kelvin Lau, anak Temenggong Datuk Vincent Lau, ti endang aktif ngelakuka kimpin pengelikun pengerai mensia mayuh di Sibu.
Kimpin nya kilah ensana endang engkeman ba maya nya, laban pengirau kena rampit baka nya majak nambah pengudah siku indu beumur 34 taun ditu udah kena rampit rabies lalu mai nyawa iya.
Nitih ku ripot surat berita The Borneo Post kena 22 Oktober tu tadi, indu nya ti kena ketup ukui ke udah dirampit rabies udah dipasukka ngagai Sepital Sibu kena 12 Oktober tu tadi laban iya ti lemi ba kededua kaki pengelama lima hari.
Iya midang kena 18 Oktober tu tadi pukul 11.30 pagi lalu disahka bisi Ensefalities rabies.
“Iya ditukuka kena rampit virus nya nengah pemutus makmal ke digaga Universiti Malaysia Sarawak (Unimas) maya 19 Oktober tu tadi,” ku Ketuai Direktor Tan Sri Dr Noor Hisham Abdullah.
Nitih ku iya, pengawa nasat udah ngayanka palan endur niang diau iya nya palan endur muai uras ke alai mayuh ukui bekedayau.
Dr Nood Hisham madahka niang udah diketup ukui inang iya empu ba pengujung taun 2018 tang enda nganjung diri berubat.
Jelu inang nya bekedayau peneka ati lalu begulai enggau jelu bukai, lalu enda kala diberi vaksin anti-rabies, ku iya nambah.
Dr Noor Hisham madahka jelu ke udah dibuai mensia mayuh laban nangika ukui nya deka ngigit orang bukai.
Taja pia, nadai sampel ti dianjung ke Opis Servis Vaterinar Sarawak kena ngenukuka kes berampit rabies bisi ba ukui nya, ku iya nandu.
Ku iya madah, kes rabies ti baru tu nyadika penyampau kes nyadi empat di Sarawak dalam taun tu.
Setipak enggau nya, ketegal kes rabies agi ditemu ditu, Temenggong Datuk Vincent Lau madahka Opis Kaunsil Mengeri Sibu (SMC) deka terus bejalaika pengawa nangkap ukui ti bekedayau ba jalai kena nangang pengelekeai igi penyakit nya ba ukui.
Iya mega ngansak mensia mayuh ngambika minta lisin pengempu ungkup ukui sida lalu ngurung jelu tupi nya dalam genturung pendiau sida lalu enda nejuka jelu nya bekedayau ba jalai.