PSB, CONNECTmeNOW mujur masang sistem servis internet ba Baleh
SIBU: Parti Sarawak Bersatu (PSB) begulai enggau kompeni telekomunikasyen CONNECTmeNOW udah masang sistem servis bungkur internet ti ngena satelit ba sekeda beberapa buah sekula ba sitak Kunsil Nengeri (DUN) Baleh.
Nitih ku Koh Kumbong, sistem nya udah dipasang ba Sekula Primari (SK) Nanga Meluan, Sungai Melinau, SK Sungai Pekau, Mujong enggau SK Lubok Mawang, SUngai Majau.
Sistem tu mega sama dipasang ba SK Lepong Gaat, Baleh, SK Lubok Baya, SUngai Oyan enggau Sekula
Sekondari (SMK) Baleh.
“Minggu ti deka datai kitai deka masang ba sekeda beberapa buah sekula agi di kandang menua Baleh tu,” ku iya ba siti penerang, kemari.
Nitih ku Koh agi, raban sekula kelebih agi bala pengajar nyambut manah servis bungkur internet nya ti deka ulih nyambung sida enggau dunya luar.
Enggau pemisi servis bungkur internet tu, deka ngemuntangka raban sekula bejalaika tanggungpengawa ninting hari kelebih agi aktiviti belajar enggau ngajar nengah chara ‘online’.
Ba pun bulan tu tadi, Koh udah betemu enggau Presiden PSB Dato Sri Wong Soon Koh kena meri penerang sistem CONNECTmeNOW tu tideka dipasang ba kandang menua pesisir ti enda ngembuan akses ngagai servis telekomunikasyen enggau bungkur internet.
Wong ti udah ngayanka diri setuju enggau sistem nya udah meri buah runding nyadika pun servis tu dipasang tauka disediaka ba kandang menua pesisir ba DUN Baleh enggau Bawang Assan.
“PSB komited nyendiaka servis komunikasyen enggau internet ngagai komuniti menua pesisir, ke diatu dipeda nyadi sebengkah ari perengkaguna pemun kelimpah ari bekal ai, elekterik enggau jalai alun,” ku iya.
CONNECTmeNOW tu nyendiaka servis data ungkup komunikasyen sereta internet kelebih agi ngagai komuniti di kandang menua pesisir ti enda ngembuan akses ngena satelit.