Siku indu midang ketegal kena rampit penyakit rabies di Sarawak
KUCHING: Igi penyakit rabies udah nabanka siti agi nyawa di Sarawak ti ngaul siku nembiak indu ti beumur 16 taun ditu.
Ketuai Direktor Opis Pengerai Malaysia Tan Sri Dr Noor Hisham Abdullah nengah penerang media madahka nembiak indu nya dipasuk ke Sepital Besai Kuching (HUS) kena 10 November 2020 lalu midang kena 11 November 2020.
“Ari pansik udah ngayanka nadai bekau kena ketup ukui tauka jelu bukai ba tubuh niang.
“Niang semina bisi bekau rajai ti udah gerai ba kaki muakka kanan tang diri sebilik iya enda madahka enggau silik bekaul pekara nya.
“Iya udah ditukuka kena rampit igi penyakit rabies kena 12 November 2020 nengah pemutus makmal ti dipejalaika ba Institut Pemansik Perubat (IMR),” ku iya.
Ku Dr Noor Hisham nerang, enggau nambah siti kes baru rabies nya, penyampau kes rabies ti nyadi ba mensia di Sarawak diatu niki ngagai enam iku dalam taun tu lalu nya ke28 kenyau ari igi penyakit rabies ditukuka di Sarawak kena 31 Julai 2017.
Opis Menteri enggau Opis Pengerai Nengeri (JKN) Sarawak ku iya deka terus matau gaya pengelekai rabies di Sarawak lalu deka bekunsika penerang tebaru bekaul pekara nya.
Opis Servis Vaterinar (DVS) Sarawak enggau DVS Malaysia ku iya madahka deka nentuka bisi pengawa nagang sereta nyeliahka rabies dipejalaika enggau naka pengelengkas sereta komprehensif.
“Kerejasama semua rayat Sarawak endang beguna, enggau nitihka semua jaku tangkan perintah sereta raban ti bekuasa kena nentuka igi penyakit rabies di nengeri tu ulih ditagang.
“Anang nejuka jelu tupi bekedayau tauka muai nya ba kandang endur mensia mayuh,” ku Dr Noor Hisham ngelalau.
Dr Noor Hisham nyemetak madahka pemati ketegal kena rampit rabies ulih diseliahka nyema mensia mayuh seruran bejejaga baka ti dipadahka.
Tuchi begian tubuh ti kena ketup ukui tauka jelu bukai ngena ai ti ngalir enggau sabun pengelama 15 minit kena muai bekau ai liur sereta berubat enggau lengkas ba klinik pengerai tauka sepital ti besemak.
Mensia mayuh mega ditangkan ngambika nuchuk vaksin anti-rabies ngagai ukui inang sida ninting taun lalu berubat enggau lengkas ba klinik jelu nyema ukui tauka mayau ti diinang bisi berubah ulah nyadi agresif.
Nyema bisi ukui ti bekedayau ba genturung pendiau, ripot ngagai Raban Bekuasa Kandang Menua lalu seruran nentuka pemeresi diri.