Kampung Pakit A, Sri Aman dipilih nyadi palan keterubah endur ngatur PJM
KUCHING: Kampung Pakit A, Sri Aman dipilih nyadi palan keterubah endur ngatur Projek Jiwa Murni (PJM) beserimbai enggau ngintu penumbuh ke-61 Briged Ketiga Infantri Angkatan Tentera Malaysia (ATM) taun tu, ensanus.
Panglima Briged Ketiga Infantri Brigedier Jeneral Datuk Azhar Ahmad madah, genturung pendiau nya dipilih lalu ke dalam zon gadung di nengeri tu.
“Program tu deka beratka ngagai pengawa negapka kaul entara Soldadu Darat Malaysia (TDM) enggau mensia mayuh ba menua nya setipak enggau ‘Tonggak Kelima Perintah Ulung Panglima Soldadu Darat Ke-28’.
“Maya bejalaika program tu, tetiap iku ke enggau endang deka seruran ngemeranka pentin ti ditetapka perintah nengeri enggau palan ke bekaul enggau nyeliahka pengelekai COVID19,” ku iya nengah penerang berita ensanus.
Bekaul enggau PJM, Azhar madahka program beripai deka dipejalaika begulai entara Raban Pasukan 13 Rejimen Askar Melayu Diraja (RAMD) enggau peranak genturung pendiau nya.
Ku iya, aktiviti nya mungkur 10 iku pemesai enggau 50 iku ke lain-lain pangkat (LLP) kelimpah peranak genturung pendiau nya.
“Bela bisi enggau ba program tu iya nya sekeda ejensi perintah menua nya baka Balai Bomba enggau Penyelamat Sri Aman sereta Opis Tanah enggau Survei
Sri Aman ke sama bisi meri bantu ngagai peranak genturung pendiau nya ba pengawa meresi genturung pendiau nya,” tambah iya.
Ngena peluang nya, iya mega lalu begulai enggau peranak genturung pendiau seraya niki ngagai beberapa buah rumah dia.
Rumah ke bisi ditiki iya baka rumah Nawai Sungau ke lalu nerima pemeri khas baka tilam enggau panggal ari raban 13 RAMD.
Kelimpah ari nya, Azhar mega bisi nyuaka bantu baka hamper enggau barang pemakai ngagai tetiap ruang bilik ke bisi endur iya nemuai.
“Bisi 43 ketuai ruang bilik nerima pemeri nya,” ku iya.