Sarawak deka bisi Palan Mansik Penyakit Berampit
Palan ti keterubah ditumbuhka di Malaysia ke beungkus RM190 juta nya deka digaga ari baruh RMK12 ba taun 2021
“Tuju palan tu ditumbuhka iya nya ngambika kitai bisi alai nempa kerejasama ba pengawa mansik begulai enggau institusyen antarabansa baka Cambridge,Oxford enggau Kolej Imperial, semua institusyen tu bejalaika pansik kelebih agi bekaul enggau penyakit ” tropika.
Datuk Patinggi Abang Johari Tun Openg
Kepala Menteri
KOTA SAMARAHAN: Perintah nengeri deka bisi Palan Mansik Penyakit Berampit ti keterubah di Malaysia, alai mansik kelebih agi bekaul enggau penyakit tropika.
Kepala Menteri,Datuk Patinggi Abang Johari Tun Openg madahka palan nya digaga ari baruh Langgur Pemasang Malaysia Lumpar Ke-12 (RMK12), iya nya dalam taun 2021.
Ku iya, perintah nengeri udah ngaga pemutus ke alai palan alai bejalaika pansik ke deka digaga di Samarahan nya semak enggau Palan Biodiversiti, digaga ari baruh Opis Menteri Pelajar, Sains enggau Pansik Teknologi ti dipegai Datuk Amar Michael Manyin Jawong.
“Kitai deka numbuhka sebuah palan alai mansik iya nya Palan Mansik Penyakit Berampit ti beungkus RM190 juta.
“Tuju palan tu ditumbuhka iya nya ngambika kitai bisi alai nempa kerejasama ba pengawa mansik begulai enggau institusyen antarabansa baka Cambridge, Oxford enggau Kolej Imperial, semua institusyen tu bejalaika pansik kelebih agi bekaul enggau
penyakit tropika.
“Kami arap bendar tu amat beguna di dunya, lalu di Malaysia, kitai (nengeri) ti keterubah bejalaika (pengawa mansik) tu kelebih agi bekaul enggau penyakit tropika,” ku iya.
Abang Johari mansutka pekara nya nya lebuh dikerandau raban pengarang berita pengudah iya bejadika ‘International Conference On Innovative Sciences And Technologies For Research And Education (InnoSTRE ) Hybrid Conference 2020’ ti diatur UiTM Sarawak ba Dewan Jubli UiTM Sarawak ditu, kemari.
Nitih ku iya, udah dikelala entara tiga ngagai empat kaban akademik enggau saintis menua tu ti ulih bejalaika pengawa mansik begulai enggau institusyen antarabansa.
“Kitai ngarapka enggau kerejasama tu, industri farmaseutikal nyengkaum ti bejalaika pansik pasal perubat, datai sereta nempa kerejasama enggau kitai,” ku iya seraya madahka langkar palan alai mansik nya udah digaga.
Dulu ari nya, lebuh ke bejaku seraya bejadi InnoSTRE Hybrid Conference 2020, Abang Johari ti ngenang pekara nya madahka palan alai mansik nya nyadi palan raban saintis gawa sereta bekerejasama enggau kaban akademik, perintah sereta institusyen di dunya ke bisi pemandai tauka penau ba pengawa mansik enggau pemansang.
Ba palan mansik nya ila, raban saintis ulih bekerejasama ngelala bagi utai ti ulih dikemansangka, ku iya.
“Ari nya, kitai deka bulih sereta ngasilka produk tauka ubat ke ulih ngurangka penyakit baru ti berampit,” ku iya.
Bejaku baru, iya madah COVID-19 siti ari penyakit lalu dipelabaka engka bisi penyakit baru bukai jemah ila ti dipelabaka nyadi ketegal penanggul rampa menua.
Bekaul enggau aum besai nya, iya ngarapka kaban akademik enggau tebangkar industri ti nyulut ari dalam enggau luar Malaysia ti ngulu aum nya, ngayanka penyulut kerejasama ba rantau Asia ba pengawa ngiga chara nagang COVID-19 nengah inovasyen dalam sains enggau teknologi.
Nya alai ku iya, aum ke diatur nya engkeman amat sereta nyadi platform alai pesereta menua tu enggau antarabansa, sekalika raban akademik tauka industri mantaika penemu enggau asil pansik ke pemadu baru sida.
“Aum tu mega udah tentu deka meri peluang ngagai pesereta mantaika inovesyen ti pemadu baru dalam pemansang sains enggau teknologi, sereta ngelala bidang enggau kerejasama baru jemah ila kena napi pemar pengudah -COVID19,” ku iya.
Nyerumba aum besai tu, Abang Johari diberi basa bejadika Palan Mansik Produk Halal enggau Palan Mansik Herba enggau Ethnomedical.
Palan Mansik Produk Halal dipejalaika nengah kerejasama entara UiTM Sarawak, Univerisiti Beijing Wuzi enggau ACEC Association, lalu Palan Mansik Herba enggau Ethnomeduical dipejalaika nengah kerejasama entara UiTM Sarawak, Anhui Medical Univerity China enggau ACEC Association.
Sama bisi datai ba pengerami nya kemari, Menteri Pelajar, Sains enggau Pansik Teknologi Datuk Amar Michael Manyin Jawong, Konsulat Jeneral Republik China di Kuching Cheng Guangzhong, ADUN Muara Tuang Datuk Idris Buang, Rektor UiTM Sarawak Professor Daro Dr Jamil Hamali enggau sida ke bukai.