Aditajaya udah sah nyemilik Parti Sarawak Bersatu
SIBU: Ex Sapit Tukang Wang Parti Keadilan Rakyat (PKR) Sarawak Dato’ Sri Abang Aditajaya Abang Alwi enggau ex Ketuai Pampang PKR Sibu Abdul Raafidin Majidi diatu udah sah nyemilik Parti Sarawak Bersatu (PSB).
Bejaku ba aum media ba indu opis PSB Bawang Assan ditu kemari, Aditajaya madahka iya ti nyemilik PSB tu mega bela dititihka lebih 6,000 kaban komuniti, nyengkaum ex kaban ke sebedau tu udah ditinggalka ari parti ke dulu nya.
“Keluar parti nyemilik parti tu endang pekara ti suah nyadi, tang tu iya nya pemindah aku dalam politik.
“Hak deka nyereta parti politik ti sah iya nya endang hak peranak Malaysia tang kitai mesti bejalaika pengawa enggau manah.
“Nama ti pemadu beguna iya nya nyereta parti politik baka PSB iya nya enggau tuju ti manah ungkup bansa enggau rayat Sarawak,” ku iya ba aum media.
Aditajaya madah, iya milih deka nyereta PSB laban pechaya ngagai chara nyadi ketuai presiden Dato Sri Wong Soon Koh ti ngembuan visyen enggau misyen ti nentuka PSB ba penuduk ke manah agi sereta tinggi ba mata rayat Sarawak.
“Aku pechaya, parti PSB ti betuaika Dato’ Sri Wong Soon Koh tu iya nya siti platform ke baru lalu endang nitihka pengandal Sarawak ti nyadi sebuah nengeri ke ngembuan pupu raban bansa enggau penatai asal.
“Kami bejalaika pengawa ungkup semua, kami meri servis enda ngira sapa, kami bepegai ngagai Konstitusyen Sarawak sereta Konstitusyen Perintah Besai enggau kami deka meri ti pemadu manah ungkup rayat Bumi Kenyalang,” ku iya.
Beserimbai enggau nya, Aditajaya mega madahka iya deka meri komitmen ti tinggi kena mantu ngenegapka sukung ari rayat sereta pengundi Melayu Melanau ba selampur Sarawak ngagai PSB.
“Enggau nya, aku deka meri seratus peratus komitmen lalu datai kediri ke 29 buah kerusi ba sitak ke bisi majoriti Melayu Melanau ti deka diperebut PSB maya Pengawa Bepilih Nengeri (PRN) ti deka datai lalu nyadi pengari Majlis Presiden ke alai iya dichiri dalam nyaga sitak Melayu Melanau tu.
“Entara sitak tu iya nya Kunsil Nengeri (DUN) Satok, DUN Bukit Sari enggau sekeda sitak ke bukai ti majoriti bisi Melayu Melanau,” ku iya nerang.
Beserimbai enggau nya, Raafidin madah, iya ti nyemilik PSB tu udah diperundingka enggau manah enggau penemu ari kaban ti sama bejalaika tanggungpengawa sereta kaban ba renggat baruh.
Ku iya madah, entara kebuah iya nyereta PSB laban ti andal enggau mentor iya bejalaika pengawa dalam parti ke suba iya nya Baru Bian enggau See Chee How dalam ngetanka tanah Adat Bansa Asal di Sarawak nyentukka diatu.
“Aku mega agi negika tanah adat Bansa Asal enggau kaban ke bukai dalam PSB kelebih agi di Tanjung Manis,” ku iya
Sama bisi datai ex Menteri ba Opis Menteri Besai Datuk Joseph Entulu Belaun, Ketuai Raban Nembiak PSB Dr Johnical Rayong Nyipa enggau Datuk Wan Abdillah Wan Edruce.