SOP PKPP ba Sarawak berengkah dipejalaika sehari tu

KUCHING: Prosedur Operasyen Standard (SOP) Atur Nagang Pemindah Mulaika Pemanah (PKPP) ba Sarawak deka dipejalai sereta diteritka berengkah sehari tu.

Pekara nya diputuska Komiti Mutarka Penusah Ngenyit Nengeri Sarawak (JPBNS), ngena chara bisi sektor udah dikemendar enggau bisi mega bedau dikemendar berengkah beoperasyen.

“JPBNS udah ngaga pemutus iya nya berengkah 28 November 2020, SOP PKPP deka dipejalaika tauka diteritka ba serata Sarawak.

“Palan beperindang baka Kelab Malam, Pub, Karaoke enggau Refleksologi agi enda dikemendarka beoperasyen nyentuk dipadah baru ila.

“Sektor bukai dikemendarka beoperasyen, tang mesti nitihka SOP ti udah dipansutka maya PKPP. Jam operasyen ungkup semua aktiviti iya nya ari pukul 6 pagi ngagai pukul 12 tengah malam,” ku JPBNS nengah penerang berita, kemari.

Berebak enggau tu JPBNS deka ngingatka semua ti dikemendarka beoperasyen patut bejalaika tanggungpengawa sida nentuka semua SOP ti dipansutka Opis Menteri Pengerai Malaysia (KKM), Kaunsil Pengelikun Menua (MKN) enggau Opis Menteri Kaunsil Kandang Menua enggau Pengawa Berumah Sarawak maya timpuh PKPP enda tau enda diasika enggau terit.

“Lalu bekaul enggau penama ke Sarawak, atur ti dipansutka sebedau tu agi dipejalai tauka dikemeranka,” ku JPBNS.

Kelimpah ari nya bekaul enggau ripot Atur Nagang Pemindah Diteritka Agi (PKPB) Pelilih Menua Kuching ti dipejalaika berengkah 9 ngagai 27 November 2020, naka kemari bisi sepenyampau 131,959 buah perengka pengangkut udah diperesa.

Lalu berengkah 9 November 2020 nyentuk kemari agi semina 613 buah perengka pengangkut diasuh nikal.

“Sehari tu (Kemari) bisi 8,698 buah perengka pengangkut diperesa maya PKPB ba Pelilih Menua Kuching. Nadai perengka pengangkut diasuh nikal,” ku JPBNS.