COVID-19: Nadai kes di Sarawak, Kuching betukar status Kuning

KUCHNG: Nadai kes positif COVID-19 baru diripotka ba Sarawak sereta Pelilih Menua Kuching betukar status ari Oren ngagai Kuning, kemari.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madahka, nya nyadika penyampau semua kes positif COVID-19 ba Sarawak agi 1,062 kes.

“Sehari tu (Kemari) nadai kes positif COVID19 baru ditemu ba Sarawak. Penyampau semua kes posisitf COVID-19 ba Sarawak agi 1,062 kes.

“Sehari tu (Kemari) mega, Pelilih Menua Kuching udah betukar status ari Oren ngagai Kuning enggau penyampau semua 18 kes berampit dalam menua tu diripotka dalam timpuh 14 hari ke udah.

“Pelilih Menua Lawas mega udah betukar status ari Kuning ngagai Gadung pengudah nadai kes baru rampit COVID-19 dalam menua tu dalam timpuh 14 hari ke udah,” ku JPBNS.

Taja pia, Pelilih Menua Miri agi betatus Kuning enggau penyampau tiga(3) kes rampit dalam menua tu ti diripot dalam timpih 14 hari ke udah sereta pelilih menua kebukai agi status Gadung.

Berebak enggau tu JPBNS madah kemari bisi tiga kes baru udah gerai sereta dikemendarka pansut ari Sepital Besai Sarawak (HUS), tu nyadika penyampau semua kes positif COVID-19 ke udah gerai sereta dikemendar pansut ari sepital nambah nyadi 1,018 iku tauka 95.86 peratus ari penyampau semua kes COVID-19 ba Sarawak.

Kemari bisi 17 PUI baru udah diripotka sereta siti PUI agi nganti pemutus makmal.

Kelimpah ari nya bisi 306 Person Under Surveillance (PUS) udah ngerejista masuk serata dikuaratin ba hotel ti nyadika penyampau semua PUS ba 34 buah hotel enggau SC Ukai Hotel bisi 3,680 iku.