Lapan iti agi menara telekomunikasyen deka didirika ba DUN Meluan taun tu
SARIKEI: Kena negapka agi bungkur agi komunikasyen kelebih agi ba sitak Kunsil Nengeri (DUN) Meluan, bisi lapan iti agi menara telekomunikasyen deka didirika dalam taun tu.
Kaban Kunsil Nengeri Meluan, Rolland Duat Jubin madah, fokus nirika menara telekomunikasyen dalam taun tu lebih agi ngagai ba kandang menua di menua pesisir.
“Entara palan ke deka alai nirika menara nya, keterubah di Tanjong Udol, Julau, kedua di Nanga Ayam, Jalai Nanga Entabai, Julau, ketiga di Ulu Strass, Serau, Julau, keempat di Nanga Sepitoh, Serau, Julau, kelima di Balut, Ulu Lasi, Julau, keenam di Nanga Kemalih, Ulu Entabai, Julau, ketujuh di Nanga Ensiring, Ulu Kanowit, Julau enggau kelapan di Jikang, Batu 15 Jalan KJD, Julau.
“Teknologi kena nirika menara telekomunikasyen nya ngena platform ‘Rangkaian Teras Pelbagai Operator (MOCN)’ ti ngembuan pengulih nangkup sekeda operator servis nya dalam siti jalai pemanchar kena nangkup pangkalan penguna sida.
“Chara platform MOCN tu dipilih pengudah berundingka pemar operasyen enggau enggau struktur ungkus ngena telekomunikasyen menua pesisir, ti semina deka megoptimumka jalai ngena, sereta nyendiaka servis ngelekat enggau ngemanah ti mimit agi ungkus,” ku Rolland.
Iya bejaku munyi nya maya Pengerami NasihTanah Menara Telekomunikasyen Multimedia Authority Rural Telecommunication 300 (SMART 300), di Nanga Ensiring Julau, ensanus.
Urung 100 iku peranak menua nya bisi ngulu pengerami nya.
Ku Rolland, peranak ba kandang menua Nanga Ensiring, di Ulu Kanowit, Julau endang sebuah genturung pendiau menau pesisir Sarawak ti jauh di ulu entigis, ti udah lama deka ngasaika perengkaguna nya.
Ku iya, peranak dia ulih ngasaika bungkur internet ke deras enti menara telekomunikasyen SMART ti didirika Kaunsil Multimedia Sarawak (SMA) tembu ila.
“Menara komunikasyen nya ila deka nyendiaka servis ngagai peranak di menua pesisir nya ngena bungkur rentayan 3G enggau 4G.
“Kami ngarapka perengkaguna tu ila ulih ngangkatka pekara pemasang ari mayuh bengkah sukut ba menua pesisir, kelebih agi di DUN N48 Meluan nyengkaum ari sukut ngangkatka ari sukut ekonomi digital kena ngemudahka rebak biak ulih ngasaika belajar nengah chara ‘online’,” ku Rolland.
Tambah iya baru, pengawa nya mega mandangka perintah Gabungan Parti Sarawak (GPS) ngelama tu endang ngintu pengelantang pendiau rayat enda ngira bansa enggau jalai pengarap kelebih agi rayat Sarawak.
Sama bisi ngulu pengerami nya, Penyanding Penemu Biro Indu DUN N48 Meluan, Sheila Ulat Pengarah, Sekretari Politik, Kepala Menteri Sarawak, Brian Fung Kok Shiun, pengari kunteriktor nirika menara, Dominic Philip enggau bala ketuai raban bansa di menua nya.