Jematan Sungai Btg Undop nyungkak ekonomi peranak di Jalai Paip: Harden
KUCHING: Penembu jematan semin meraka Sungai Batang Undop ba Rh Meria Lutang, Kampung Sengelau, Undop meri pangka ti tinggi ngagai pemansang ekonomi seraya nyungkakka tikas pengidup peranak ti ngelinggi kandang menua Jalai Paip di Sri Aman.
Projek ti beungkus RM640,000 udah tembu beberapa bulan ke udah, mujur dipenyadi Menteri Muda Pemansang Pendiau Raban Bansa ti mega Kaban Kunsil Nengeri (ADUN) Simanggang Datuk Francis Harden Hollis ensanus.
Harden madahka, ungkup belanja ari perintah Gabungan Parti Sarawak (GPS) nya meri penguntung enggau pengelantang ngagai komuniti tauka raban bansa.
“Enggau penembu jematan tu udah muka peluang pemansang betanam betupi ba seberai Sungai Batang Undop sereta diatu udah dikemendarka enggau benung dalam proses ngaga jalai ladang penyauh 800 meter nuju ke ladang skim sibau enggau ungkus belanja RM80,000,” ku iya.
Bejaku baru iya madahka pemansang infrastruktur ti dibai perintah GPS mayuh nguntungka rayat lebih agi ke diau di menua ulu.
“Ukai baka ti selalu dipadah penyakal ke suah ngenyaruka runding rayat madah nadai pemansang dibai (perintah).
“Penyakal baka ti takutka pemansang ke dibai perintah GPS sereta sida iya ngenggaika nya (pemansang),” ku iya.
Ku iya, penyakal nadai kuing tauka tuju ti nyengenda laban perintah GPS udah bejalaika semua perambu sereta perambu perintah lebih meruan tauka manah enggau mungkur semua rayat.
Nambahka nya iya madahka perintah Sarawak dipegai GPS bisi pun penatai pemisi ti tegap asil ari pengawa minta pulai hak nengeri dalam Sempekat Malaysia 1963 (MA63) ke udah lama betangguh sereta enda dipejalaika.
“Kitai ukai ngambi hak orang bukai, kitai semina minta hak kitai baka ti udah ditulis dalam MA63.
“Nya alai rayat anang mudah kena keruga pusin jaku sida penyakal,” ku iya.
Sama datai ngulu pengawa bejadi jematan konkrit nya ensanus bini Harden, Datin Simba Nalang, Sapit Residen Bagi Menua Sri Aman Ellvis Didit, Pemesai Pelilih Menua Sri Aman Mohd Adhree Wee, pengari Jurutera Bagi Menua JKR Sri Aman Michelle Kristie Felix enggau Pemangku Pemesai Opis Pemadah pelilih Menua Sri Aman Jessecca Gilbert Bunsu.