Pengawa nyaga garis entara menua terus diteritka agi
KUCHING: Pengawa nyaga garis entara menua Sarawak-Kalimantan terus diteritka agi lalu deka lebih bejejaga kena napi sebarang penusah ke ulih ngeruga pengelikun raban penerit adat ti bejalaika pengawa.
Pesuruhjaya Polis Sarawak Datuk Aidi Ismail madah, gaya di garis entara menua diatu agi likun lalu nadai pengawa baka kes mai senyata enggau nadai pemendar naka diatu.
Pia mega ku iya, Pasukan Gerakan Am (PGA) sereta Polis Marin bisi tim khas matau pengawa ti digaga belalai ba garis entara menua enggau kandang tasik nengah ‘Ops Benteng’ enggau ‘Ops Khazanah’.
“Taja pia, kitai enda ulih enda ibuhka pekara ti nyadi ba geris entara menua Malaysia-Thailand bedau lama ti udah lalu kitai deka terus nentuka raban penerit adat nyaga enggau memanah garis entara menua lalu seruran besedia napi sebarang penusah ti nyadi,” ku iya bejaku ba siti aum media, ditu kilah ensana.
Iya kelimpah ari nya madahka mayuh kes ba garis entara menua ti mujur diputarka baka pengawa mai insap enggau ai arak ti nadai pemendar.
Beserimbai enggau nya, bejaku bekaul enggau penyalah indeks, Aidi madahka penyalah nyerungkai rumah bisi ngayanka penambah dalam taun tu.
“Ari tasat ti dipejalai, mayuh ari rumah ti diserungkai tu iya nya rumah ti nadai orang diau lalu semina ngaul rugi mimit, tang nya tetap kes penyalah.
Berindik ari nya, iya madahka Unit Nasat Kes Penyalah (JSJ) deka numbuhka tim khas dalam mutarka kes penyalah nyerungkai rumah tu nyengkaum ba pelilih menua besai baka Kuching, Miri, Sibu enggau
Bintulu.
Dulu agi ari nya, Aidi udah ngemataka pengawa serah terima pengawa Ketuai Unit Nasat Kes Penyalah (JSJ) Sarawak ke baru SAC Mat Zani @ Mohd Salahuddin Che Ali enggau ACP Zulfikar Mohd Ghazali ti nyadi pemangku pengawa nya sebedau tu.