50 peratus sampel ukui di Sibu positif rabies
SIBU: Gaya kes berampit rabies di Sibu diatu ngirauka ati berindik ari 50 peratus sampel ukui ti diambi lalu dianjung ngambika ngadu pansik virus rabies ngayanka nya positif.
Menteri Muda Pengerai Mensia Mayuh Dr Annuar Rapa’ee madahka, bisi 104 sampel udah diambi ngambika dipansik dalam taun tu lalu 50 ari sampel nya diuji positif rabies.
“Dalam reti bukai, nyema bisi dua iku ukui siga ti bekedayau ba kandang endur kita, siku ari nya nyangka positif rabies lalu enda dikenggai mega siku agi nya deka sama dirampit.
“Berindik ari nya, nyema kita nanya ngagai aku dini kandang endur mayuh rabies di Sibu diatu, aku ulih madah ba dini-dini aja nyema kitai meda ngagai penyampau (positif rabies) tu,” ku iya maya aum media pengudah bejadika Program Plogging, Kesedaran Pembasmian COVID-19, Wabak Rabies enggau Kimpin Pemereti Ati Pengelikun Jalai Alun ba Padang Futsal Kampung Nangka, kemari.
Sama bisi datai Senator Robert Lau Hui Yew, Residen Bagi Menua Sibu Charles Siaw, Chairman Opis Kaunsil Mengeri Sibu (SMC) Clarence Ting enggau Pemesai Perubat Bagi Menua Sibu
Dr Teh Jo Hun.
Nitih ku Dr Annuar ke mega Menteri Muda Pelajar, Sains enggau Pansik Teknologi, iya ukai deka ngasuh komuniti teguran ati, tang semina dekaka peranak ba Sibu bejejaga enggau ukui siga di kandang endur sida.
Kebuah pia, ku iya, statistik ari Komiti Nagang Penyakit Berampit Rabies Bagi Menua Sibu dalam taun 2020 ngayanka iya nya bisi 1,801 iku ukui ti bekedayau udah ditangkap.
Ba taun ke sebaka, bisi 1,350 kes kena ketup ukui diripotka ke alai pelilih menua Sibu ngerikodka penyampau kes ti tinggi iya nya 1,213 kes, lalu ditangkan 90 kes ba Kanowit sereta 47 kes di Selangau.
“Udah tentu raban ti bekaul baka Opis Veterinar enggau opis kaunsil ngaga mayuh macham chara nyeliahka enggau manah nengah program pemereti ati enggau vaksinasyen enda bebayar.
“Tang napa ti pemadu dikemerat iya nya chara nyaga pengelikun ke patut dikemeratka mensia mayuh enggau nentuka sida enda diketup ukui, nyema diketup, lengkas ke klinik tauka sepital ti besemak,” ku iya.
Beserimbai enggau nya, Lau minta ngambika ripot kes rabies di Sarawak dikemaru kelebih agi di bagi menua Sibu lalu dipadahka ngagai mensia mayuh baka ripot kes COVID-19.
Ku iya madah, mensia mayuh patut dipadahka bekaul penyampau sereta kandang endur ti pemadu baru bisi kes rabies ba kandang menua sida kena ngangkatka pemereti ati bekaul pekara tu.
Bekaul pekara nya, Dr
Annuar besetuju enggau perambu nya lalu iya madahka endang beguna mensia mayuh dipadahka enggau manah.
“Baka ripot COVID-19, ninting hari mensia mayuh dipadahka bekaul penyampau kes sereta kandang menua ba zon mirah.
“Berindik ari nya, kitai patut minta pemendar ari Komiti Mutarka Penusah Ngenyit Nengeri Sarawak (JPBNS), sekalika kitai ulih madahka berita bekaul gaya rabies ninting minggu ngagai mensia mayuh,” ku iya.