Nentuka Sabah, Sarawak ngena manah agih belanja ke diberi
Pengawa beratika chara ngena agih belanja ke diberi dalam Bajet 2021 dipejalai begulai enggau EPU, Opis Sekretari Perintah Besai
“Kami deka ngaul diri (dalam) ba agih belanja ti diungkupka ngagai Sabah enggau Sarawak ngambika nya amat kena mutarka pekara ti deka diputarka. ”
Datuk Seri Dr Maximus Johnity Ongkili
Menteri Ba Opis Menteri Besai (Pekara Sabah enggau Sarawak)
KUALA LUMPUR: Perintah deka beratika chara ngena agih belanja RM5.1 bilion ungkup Sabah enggau RM4.5 bilion ungkup Sarawak dalam Bajet 2021, pia ku Dewan Rakyat dipadahka ba aum.
Menteri ba Opis Menteri Besai (Pekara Sabah enggau Sarawak) Datuk Seri Dr Maximus Johnity Ongkili madah, pengawa beratika nya deka dipejalai begulai enggau Unit Perambu Ekonomi (EPU) nengah Opis Sekretari Perintah Besai ba kedua-dua nengeri nya.
“Kami deka ngaul diri (dalam) ba agih belanja ti diungkupka ngagai Sabah enggau Sarawak ngambika nya amat kena mutarka pekara ti deka diputarka,” ku iya lebuh nutup jurai sentang Rang Undang-undang Perbekalan 2021, renggat Komiti ungkup portfolio iya.
Dulu ari nya ba sesi besara penemu, Chong Chieng Jen (PH-Stampin) madahka agih belanja ungkup kedua-dua nengeri nya dalam Bajet 2021 besiping laban amat berupai enti dipeda ari sukut agih belanja pemansang.
Berebak enggau nya, Maximus madahka pemisi seksyen Pekara Sabah enggau Sarawak ari baruh Opis Menteri Besai, ti keterubah endar bejalaika pengawa mansik pekara enggau hak kedua-dua nengeri nya nyengkaum pekara ti dipikir rayat enggau perintah nengeri.
“Asai aku tu mih keterubah endar pekara bekaul Sabah enggau Sarawak diengkah ari baruh sebuah opis rasmi baka sebuah opis menteri. Kami arap endar menteri besai keran amat deka utai ke pemadu manah ungkup Sabah enggau Sarawak, lalu kami pechaya nama utai ti diperambu ke deka digaga perintah, begunaka sukung semua kaban Parlimen,” ku iya.
Sebedau tu, perintah udah numbuhka Kaunsil Khas Bekaul Enggau Sempekat Malaysia 1963 (MA63) ti ditumbuhka kena ngintu hak Sabah enggau Sarawak baka ke bisi dalam Sempekat Malaysia 1963.