Anang mudah berubah runding mendingka semaya ari penyakal
SRI AMAN: Bala Tuai Rumah kelebih agi dalam sitak Kunsil Nengeri (DUN) Simanggang diatu udah nemu sereta meretika gaya politik ke dibai penyakal ti semina tau ngemuntanka pemansang ke udah diperambu enggau manah, perintah ke diatu.
Menteri Muda Pengelantang Komuniti Sarawak, Datuk Francis Harden Hollis madah, nyema ketuai raban bansa (Tuai Rumah) tu kena ginti engau semaya manis penyakal, nya deka ngerugika ketuai raban bansa nya ungkup timpuh ke panjai.
“Nya alai, ketuai raban bansa anang mudah berubah runding mendingka semaya ari penyakal ke semina naburka semaya puang ti enda ulih mai sebarang ubah ngagai komuniti di menua nya.
“Rayat diatu udah nemu berundingka utai ti manah enggau jai. Rayat kitai deka ke pemasang belama lalu ukai semaya bula, tang pemansang enda digaga,” ku iya nyemetak.
Harden ke mega Kaban Kunsil Nengeri Simanggang bejaku munyi nya maya’ Program Info On Wheel’ ke diatur Opis Pemadah Malaysia Sarawak Pelilih Menua Sri Aman, ba Rumah Achon Watt, Menalang A, Sri Aman ditu kemari.
Berebak enggau nya, lapan iku tuai rumah nyengkaum Tuai Rumah Achon Watt ke bisi ngulu program nya madahka diri deka meri sukung ke enda bebagi ngagai chalun Gabungan Parti Sarawak (GPS) ba kerusi DUN Simanggang, iya nya Datuk Francis Harden Hollis.
Ku sida, prestasi pengari rayat nya manah amat ba pengawa mai pemansang sereta nyamai enggau berandau.
“Kami mega nemu semina perintah GPS aja ulih mai pemansang ngagai serata nengeri Sarawak.
“Enda baka penyakal ke ensugau angkat dani tindok. Bejaku utai sengapa sereta nadai isu laban utai ti deka disemaya udah sereta benung digaga perintah GPS,” ku iya.
Sama bisi ngulu program nya, Sapit Residen Bagi Menua Sri Aman, Elvis Didit, pengawai Pemesai Pelilih Menua Sri Aman, Sandin Ajah, Pemangku Pemesai Opis Pemadah Pelilih Menua Sri Aman, Jessecca Gilbert Bunsu, bini Harden, Datin Simba Nallang, Sapit Chairman Majlis Daerah Sri Aman (MDSA), Kunsilor Andar Suntai enggau bala bukai.
Ba pengerami nya, Harden udah ngemendarka geran ari perintah nengeri Sarawak sepenyampau RM5,000 ungkup Komiti Pemansang enggau Pengelikun Genturung Pendiau (JKKK) Rumah Achon Menalang lalu RM3,000 ungkup Biro Indu.