JKKK diperansang negapka sistem atur pengawa sida
SARIKEI: Kaban Kunsil Nengeri Meluan, Rolland Duat meransang Komiti Pemansang enggau Pengelikun Pendiau (JKKK) negapka sistem atur pengawa sida.
Ku iya, pengawa nya patut dipejalaika nengah konsep ke lebih sistematik sereta teatur agi.
JKKK ngembuan tanggungpengawa ke beguna amat nempa sesebengkah komuniti kelebih agi ba renggat genturung pendiau tauka rumah panjai, ku iya.
“Nya alai, JKKK patut nyingkang setipak enggau pemansang ke diatu ngambika peranak di rumah panjai enggau genturung pendiau ulih ngasaika pemansang ke digaga perintah.
“Kitai ngarapka semua kaban JKKK ulih nempa kaul ke manah enggau nembiak redak ngambika misyen enggau visyen ngemansang nya mujur dipejalaika,” ku iya.
Iya bejaku munyi nya lebuh Bejadi ‘Bengkel Komuniti Kepolisan’ di Rumah Bajau, Rantau Kuyang, Mujok Julau ti digulu urung 150 peranak menua nya.
Ku Rolland, kaban JKKK ti enggau ba pengawa nya ulih mantu ngangkatka lalu nyaga pengelikun enggau pengelantang ba genturung pendiau.
“Embing Ketuai Raban Bansa enggau Ketuai Bansa (KMKK) nyengkaum JKKK beguna amat nyadika penyanding ba renggat komuniti genturung pendiau ba pengawa nyeliahka penanggul rama, penusah ngenyit enggau penyakit.
“Diatu, menua benung napi pandemik COVID-19 lalu tetiap iku rayat patut ngemeranka prosedur operasyen standard (SOP).
“Nya alai, kedua-dua piak sekalika KMKK tauka JKKK patut nentuka tetiap iku peranak rumah panjai tauka genturung pendiau ngemeranka ‘norma’ baru kena nyeliahka pengelekai COVID-19,” ku iya.
Sama bisi ngulu pengerami nya,Pemesai Opis Pelilih Menua Julau Khalid Andong, Sekeretari Politik Kepala Menteri Brain Fung Kok enggau bala ketuai raban bansa di menua nya.