Kaban DAM peransang majak beserakup enggau pangan diri
MIRI: Kaban Gerempung Dayak Miri (DAM) peransang majak beserakup enggau pangan diri.
Kaban Kunsil Nengeri Samalaju, Majang Renggi madahka semina nengah kerejasama gerempung nya ulih majak relevan sereta bejalaika pengawa ngintu pengelantang pendiau kaban gerempung nya.
“DAM ditumbuh 58 taun ke udah lalu nyadi sebuah Gerempung Dayak ke pemadu tuai di Sarawak,nya alai kerejasama enggau sukung kaban gerempung beguna amat kena nentuka nya terus relevan sereta gawa ke raban bansa Dayak kelebih agi Iban,” ku iya bejaku ba Malam Meri Terima Kasih enggau Nyiri Komiti DAM ditu, bedau lama udah.
Ku iya, taja pan gerempung nya ngena nama Dayak tang nyauka 100 peratus kaban gerempung nya bansa Iban.
Ku iya, komitmen tinggi kaban gerempung beguna amat laban sida ke dichiri mangku pengawa nyadi komiti dalam gerempung nyagawa nyadi volenteer.
“Aku meri pengaga ati ngagai komiti DAM ke sebedau tu laban komited ngatur bemacham program dalam ekonomi, pelajar enggau budaya ungkup kaban DAM.
“Terima kasih mega ngagai kaban komiti lama lalu aku ngarapka majak meri kerejasama ngagai komiti ke baru ila,” ku iya.
Ba pengerami nya, Majang ngungkupka RM20,000 ngagai gerempung nya nambika bisi dikena sida bejalaika aktiviti taun baru.
Ba pengerami nya mega,kaban komiti baru sesi 2020-2021 Pampang Indu enggau Nembiak bisi macha semaya sereta nyuaka perais pengaga ati ngagai komiti sesi 2018-2019.
Majang maga bisi nyuaka insentif enggau anugerah ngagai bala anak kaban DAM ti nyulut dalam akademik enggau orang ti bulih pemujur dalam menua enggau menua tasik.
Sama bisi ngulu pengerami nya, kedua-dua Penyan ding penemu DAM Senator Dr Nuing Jeluing enggau Serawa Budol, Presiden DAM Wilfred Mac enggau chairman pengatur pengawa, Jacqueline Selaka.