Siti kes baru positif COVID-19 di Sarawak kemari
KUCHING: Bisi siti kes baru positif COVID-19 diripotka ba Sarawak ti bekaul enggau pelatih ba Institut Latih Opis Menteri Pengerai Malaysia (ILKMM), kemari.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah, enggau penambah siti kes baru nya nyadika penyampau semua kes positif COVID-19 ba Sarawak nyadi 1,065 kes.
Ku JPBN, siti kes baru positif COVID-19 nya kemari dirikotka Pelilih Menua Kuching sereta dikategori kes berampit dalam menua tu empu.
“Kes 1,065 tu iya nya siku peranak menua tu ti mega pelatih ba ILKMM. Kes nganjung diri beperesa ba sebuah klinik pengerai perintah kena 30 November 2020 laban ti deka pulai kemisi ke Sabah.
“Pemutus rT-PCR COVID-19 kes iya nya ditemu posisif sehari tu (kemari). Kes nadai ngayanka sebarang tanda rampit COVID-19,” ku JPBNS seraya madah kes udah dipasuk ba wad kediri Sepital Besai sarawak.
Nitihku JPBNS, kes datai ba Sarawak ari Sabah kena 15 September 2020 sereta kes kala beperesa COVID-19 ngena rT-PCR dalam bulan Jun 2020 maya ba Tawau, Sabah tang pemutus negatif COVID-19.
Kes agi dipansik sereta pengawa nyidi kontak semak benung chakah dipejalaika, lalu kes bedau ulih dikaulka enggau enda ngira bagi kluster ke agi aktif di Pelilih Menua Kuching.
Naka kemari kluster ke agi aktif ba Sarawak iya nya Kluster Besi, Kuching; Kluster Jalai Abell, Kuching; Kluster Baki, Kuching; Kluster Seladah, Kuching; Kluster Greenhill, Kuching enggau Kluster Wisma Saberkas, Kuching.
Bisi semilan kes baru udah gerai sereta dikemendarka pansut ari wad kediri HUS, kemari.
“Tu nyadika penyampau semua kes postif COVID19 ke udah gerai sereta dikemendarka pansut ari sepital nambah nyadi 1,031 iku tauka 96.81 peratus ari penyampau semua kes COVID-19 di Sarawak,” ku JPBNS.
Kemari, bisi 33 PUI baru diripotka sereta bisi enam PUI agi nganti pemutus peresa makmal.
Kelimpah ari nya kemari bisi 300 Person Under Surveillance udah ngerejista masuk ba hotel sereta dikuarantin, ti nyadika penyampau semua PUS ba 38 buah hotel enggau SC Ukai Hotel nyadi 3,924 iku.
Bekaul enggau status pelilih menua ba Sarawak, Pelilih Menua Kuching enggau Miri agi bestatus Kuning enggau penyampau semua kes bisi 14 kes berampit diripotka dalam timpuh 14 hari ke udah iya nya Kuching (12) enggau Miri (2).
Lalu 38 buah pelilih menua ke bukai bestatus Gadung.