Pekit Pantun Iban ‘online’ agi dibuka nyentuk 31 Dis 2020

KUCHING: Pekit Pantun Iban Trofi YB Datuk Amar Douglas Uggah Embas ti diatur nengah chara ‘online’ agi dibuka ngagai mensia mayuh nyentuk 31 Disember 2020.

Ketuai ASADIA ti mega tuai pengatur pekit nya, Mabong Unggang (gambar) madah, ngagai sapa ti rindu bepantun Iban tau nyereta pekit nya nya nengah chara nganjung Video Clip email ngagai asadiabt7@gmail. com.

“Pekit Pantun Iban tu ke diatur nengah chara online, dilanjar ngagai 31 Disember 2020.

“Kebuah dilanjar kena meri peluang ngagai mayuh agi orang ke deka nyereta pekit tu beserimbai enggau kemisi Krismas sereta kemisi ujung taun,” ku iya madah ngagai Utusan Borneo, kemari.

Nitihku iya pekit nya ti diatur ASADIA begulai enggau WAIFM Iban, endang dikena ngangkat sereta ngerembaika Pantun Iban nyadi siti ari leka main asal ti dikerindu nembiak rebak baru.

Nambahka nya dikena ngangkatka pengelandik ngena leka jaku Iban dalam sereta bebungai, ku iya.

“Tuju kami ngatur tu mega dikena meri peneleba ngagai mensia mayuh sereta ngambi ulih meretika leka pantun Iban ke ngundan leka jaku peransang, puji enggau sebana,” ku iya.

Pemenang dibagi ngagai tiga kategori iya nya Kategori Pemenang Ditentuka Akim; Kategori Pemenang Ditentuka Undi ‘Like’ ba Facebook Page Akademi SADIA enggau Facebook WaiFm Iban sereta ketegori ketiga iya nya Kategori Pemenang Video Clip Pemadu Manah.

Pemenang tetiap kategori deka nerima perais mata duit, trofi, midul enggau setipikit.

“Barang sapa ti deka nemu silik bekaul enggau pekit tu tau nanya ngagai aku empu ba lumur 012-6925562 tauka ngagai Sekretariat Pekit Bepantun Victoria Jimy ba lumur 012-2161485,” ku Mabong.

Sebedau tu ASADIA mujur ngatur pekit ngajat enggau pekit beganu nengah chara online.