Servis rehabilitasyen 3M deka disedia ungkup orang dalam jil

KUCHING: Opis Menteri Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit sedia bekerejasama enggau Opis Jil Nengeri Sarawak nyendiaka servis dalam bidang rehabilitasyen, iya nya pengelandik macha, nulis enggau ngira (3M).

Menteri iya, Dato Sri Fatimah Abdullah madah, nya kena meri peluang sereta servis ngagai orang jil ti tau dikumbai mayuh enda nemu tiga pengelandik iya nya macha,nulis enggau ngira.

“Kami deka beratika engka opis menteri kami ulih nyendiaka servis ngagai bala anak ke bisi ba Sekula Henry Gurney ditu, keterubah, dalam bidang rehabilitasyen iya nya bekaul enggau pengelandik macha, nulis enggau ngira.

“Pansik bisi ngayanka ba sida orang jil bisi penyampau ti mayuh ke bisi penanggul enda nemu macha ketegal badu sekula. Lalu bisi ke enda nemu macha mega ketegal sida ia diseleksia.

“Nya alai kami ulih nyendiaka servis ngaga ‘assessment’ ungkup sida ke bedau nemu macha sereta nyema sida nya ditemu betapi penanggul diseleksia kitai deka bejalaika intervensyen mulaika pemanah awakka sida gerai sereta ulih macha,” ku iya.

Fatimah madahka pekara nya ba aum pengarang berita nyerumba pengerami bejadi Produk CantiKK@HG ti diatur ba Auditorium Sri

Sarawak, Opis Direktoe Jil Nengeri Sarawak, Jalai Puncak Borneo ditu, kemari.

Ku iya, opis menteri iya beratka pekara nya laban beratika pengelandik macha amat beguna kena nambahka pengandal diri.

“Macha amat beguna laban ngelinggi kitai endang utai dibacha magang baka dalam komputer, label enggau ke bukai ti begunaka kitai landik macha.

“Laban nyema nadai pengelandik macha nya ulih ngujungka kurang asai dipebasa, ari tu penanggul sosial tau nyadi,” ku iya.

Dulu ari nya Fatimah muji kerejasama strategik Produk CantiKK@HG entara Kolej Komuniti Kuching enggau

Opis Jil Nengeri Sarawak enggau Sarawak Craft Counsil ti nyendiaka program pengelandik ba pengawa dagang enggau ngasilka produk.

Iya madahka kerejasama strategik nya setipak amat enggau konsep rehabilitasyen, iya nya nyendiaka peluang ngagai bala anak ba Sekula Henry Gurney bekaul enggau pengidup ke jemah ila.

“Aku chukup temegah ati meda produk ti diasilka sida tu. Sida ngasilka produk tu ukai setaun tang dalam bulan September ngagai Oktober iya nya dalam timpuh sebulan aja ulih ngasilka produk ti chukup ngemegahka ati.

“Sehari tu (kemari) kitai meda chap iya, tu (chap) amat beguna dalam bidang dagang ke patut dipadah ngagai bala anak kitai (Sekula Henry Gurney) ti bisi ngayanka pengerindu dalam bidang batik enggau ‘canting’ tu.

“Sida ulih ngasilka produk ti mayuh enggau praktikal lalu aku arap bendar ulih dijual ditambah agi enggau chap ti nyelai. Nama nya disambung ari Canting Batik Kolej Komumiti (CantiKK) @HG,” ku iya seraya madah Sarawak Craft Council deka mantu ngelakuka Produk CantiKK@HG nya.

Sama bisi datai ba pengerami nya kemari,Sapit Komisioner Jil Mohamad Rosidek Musa; Direktor Kolej Komuniti Kuching Suharyati Sulaiman; Penulung Pengdeka atur Pengawa Sarawak Craft Counsil Esther Indut Luat enggau Pengempu Helmy Batik Craft Halmi Chek.

— Gambar JaPen MANAH: Fatimah beratika entara ‘canting’ batik ke bisi diayan seraya mendingka penerang ari Suharyati (kanan), kemari.

NYELAI ARI KE BUKAI: Kain batik enggau produk fail sarung surat (envelope) kain batik ti diasilka nengah kerejasama strategik entara Kolej Komuniti enggau Sekula Henry Gurney, Penjara Negeri Sarawak.

KEREJASAMA: Fatimah nyadi saksi ba pengawa nyuaka setipikit kerejasama strategik industri entara Kolej Komuniti Kuching ti diarika Suharyati (kiba) enggau Rosidek ngarika Jil Negeri Sarawak, kemari.