AGRO Bank deka engkah siti mesin ATM ba ‘Anjung Usahawan Gedong’ enda lama agi
KUCHING: Servis Automatic Teller Machine (ATM) deka diengkah ba ‘Anjung Usahawan Gedong’ berengkah bulan tu kena ngemuntangka peranak di menua pesisir enggau menua ulu ti bisi pengawa ke deka diadu ba bank.
Menteri Muda Pemansang Dagang Antarabansa enggau Industri, Terminal Industri enggau Pemansang Orang Dagang,DatukMohdNaroden Majais madahka diri bisi nerima surat pemendar ari AGRO Bank pasal pekara nya.
“Surat pasal pekara tu udah disuaka Menijar Zon AGRO Bank Sarawak, Abdul Halek Abdullah ngagai aku.
“Nitih ku AGRO Bank nya, mesin ATM nya deka beoperasyen bulan Disember sereta deka dipasang ke alai bank nya deka ngubah premis nya ila.
“Aku ngarika peranak di Gedong chukup beterima kasih ngagai AGRO Bank laban udah ngemendarka siti unit mesin ATM ti deka diengkah ba Anjung Usahawan Gedung enda lama agi,” ku iya ti mega Kaban Kunsil Nengeri (ADUN) Gedong nengah penerang berita, kemari.
Nambahka nya, iya madahka mesin ATM ulih meri servis ngagai urung lebih 7,000 peranak asal Gedong sereta 4,000 pekereja ti kereja sereta diau ba ladang kelapa sawit.
Nitihku iya, sebedau tu peranak menuya ke Serian nyema bisi urusan mansut enggau nganjung duit, nerima bantu ari perintah enggau ke bukai.
Naroden madahka mesin ATM nya amat praktikal sereta nyema bisi peminta iya deka minta bank nya nambahka pemayuh mesin nya.
Kelimpah ari nya, Halek dalam penerang madahka mesin nya disediaka berindik ari bisi peminta ari Naroden ti madah bisi pematut kandang menua nya disediaka servis mesin ATM.
“Nya alai kami beratika pekara tu, mansik sereta endang amat bisi pematut enggau peminta guna ti tinggi ba kandang menua Gedong, lalu dikearapka enggau pemisi mesin ATM ti disedia nya ulih nyungkak ke agi ekonomi peranak menua Gedong laban nyema bisi ‘cash’ ba kandang menua tu, tentu deka mayuh peluang dagang ditumbuhka.
“Ambika chunto, kedai runchit deka meri peluang kereja ngagai peranak ba menua tu, kami beratika pekara tu lalu ari nya kami ulih mantu raban bansa menua pesisir kelebih agi di Gedong.
“Kami merambu deka nyendia tauka mayuh agi mesin ATM ba endur bukai ke amat beguna sereta bisi pematut,” ku iya.