COVID-19: 255 kes baru positif, siti kes pemati dirikodka di Sarawak kemari

KUCHING: Sarawak ngerikodka 255 kes positif baru COVID-19 enggau siti kes pemati ketegal rampit COVID-19, kemari.

Sekretariat Komiti Mutarka Penusah Ngenyit Nengeri Sarawak (JPBNS) madahka , nya ngujungka penyampau semua kes positif COVID-19 ba Sarawak nambah nyadi 9,374 kes enggau 81 kes pemati.

“Sehari tu (Kemari) bisi 255 kes baru COVID-19 ditemu enggau diripotka ba Sarawak.

“Pelilih menua ti ngeripotka kes iya nya Pelilih Menua Sibu (106), Selangau (27), Miri (26), Kapit (22), Bintulu (13), Kuching (12), Betong (11), Kanowit (9), Sri Aman (8), Dalat (5), Bukit Mabong (5), Bau (4), Pusa (2), Saratok (2), Meradong (1), Sarikei (1) enggau Subis (1). Tu ngujungka penyampau semua nambah nyadi 9,374 kes.

“Lalu mega sehari tu (kemari) bisi siti kes pemati baru ketegal rampit COVID-19, tu gujungka penyampau semua kes nambah nyadi 81 iku tauka sepenyampau 0.86 peratus ari penyampau semua kes positif diripotka ba Sarawak,” ku JPBNS nengah penerang berita, kemari.

Bekaul enggau kes pemati ke-81 iya nya kes ke-6,673 siku lelai peranak menua (Sarawak) beumur 77 taun ti diperubatka ba Sepital Sibu maya meresa kontak semak ngena ujian rTPCR COVID-19 iya nya ditemu positif kena 13 Februari 2021.

Tikas pengerai kes majak enda manah sereta ditetapka udah nadai kena 27 Februari 2021.

“Kes bisi ko-morbid penyakit darah tinggi, dislipidemia enggau sejarah strok. Kes pemati tu bekaul enggau kluster aktif iya nya Kluster Geronggang di Sibu.

“Komiti Mutarka Penusah Ngenyit Nengeri Sarawak (JPBNS) meri penyinu ati ngagai orang ke sebilik enggau kes,” ku JPBNS.

Kelimpah ari nya , JPBNS ngeripotka kemari bisi 242 kes baru ti udah gerai sereta dikemendarka pansut ari Sepital Miri (98), Sepital Sibu (77), PKRC Sepital Kapit (46), Sepital Besai Sarawak (11), Sepital Bintulu (8), enggau Sepital Sarikei (2).

Tu nyadika penyampau semua kes positif COVID19 ke udah gerai sereta dikemendarka pansut ari sepital nambah nyadi 6,862 iku tauka 73.20 peratus ari penyampau semua kes COVID-19 ba Sarawak.

Kemari mega bisi 256 PUI baru udah diripotka enggau tiga PUI ti agi nganti pemutus ujian makmal.