Renggat keterubah meri vaksin ngagai raban terabai menua berengkah 6 Mac
MIRI: Renggat keterubah meri vaksin ngagai raban terabai menua Opis Menteri Pengerai Malaysia (KKM) enggau ti ukai KKM ditu, berengkah 6 Mac tu, pukul 3 lemai ba Dewan Eastwood enggau Dewan Dato Permaisuri, Permyjaya.
Menteri Perengka Pengangkut,Datuk Lee Kim Shin ke mega menteri ti megai tanggungpengawa ba Komiti Mutarka Penusah Ngenyit Bagi Menua (JPBB) Miri, madahka dua dos vaksin nya deka dipeberi pengudah betakah 21 hari.
“Dos keterubah dipelabaka diberi 6 Mac tu lalu dos kedua dijangka abis kena minggu keterubah ba bulan April.
“Aktiviti meri vaksin kategori terabai menua dipejalaika nitihka tusun enggau semaya ke digaga ba enam palan meri vaksin (PPV) di Bagi Menua Miri,” ku iya ditu kemari.
Lee ngulu aum nengah chara zoom enggau Komiti Mutarka Penusah Ngenyit Nengeri Sarawak (JPBNS) begulai enggau Opis sereta ejensi ari baruh JPBB Miri madah, bisi dua PPV dikhaska ungkup terabai menua kategori perubat KKM iya nya Sepital Miri enggau Sepital Marudi.
Ku iya, bisi empat PPV agi dikhaska ungkup terabai menua Pengerai Mensia Mayuh KKM enggau ukai KKM iya nya Dewan Eastwood, Dewan Dato Permaisuri di Permyjaya, Dewan Suarah Marudi enggau Dewan Mensia Mayuh Bekenu.
“Raban pengereja pengawa PPV deka bisi ba PPV ari pukul 8 pagi, nyikap lalu nyendiaka diri ninting hari ba semua PPV ti dirintaika.
“Maya meri vaksin iya nya berengkah ari pukul 9 pagi nyentuk 4 lemai, jam ngetu belelak iya nya pukul 1 ngalih hari nyentuk pukul 2 lemai,” ku Lee.
Ku iya, tetiap opis ti dirintaika nyadi terabai menua, netapka siku pemesai koordinator ba renggat opis sida empu.
Rintai ke besemaya, palan PPV enggau penyampau diberi vaksin ninting hari dipadahka nggai pemesar koordinator opis terabai menua nya empu.
“Pemesai koordinator tetiap opis dipinta bekerejasama enggau ketuai opis terabai menua sida empu, ngambika ngenataika pemadah enggau ngatur maya pengawa meri vaksin nya dipejalaika.
“Hari bulan tentatif pengawa meri vaksinasyen renggat kedua ngagai mensia mayuh ti berisiko tinggi nyengkaum orang lunggar umur, penyakit kronik enggau ke bukai iya nya kena bulan April.
“KKM enggau JPBN Sarawak deka enggau rasmi tentang pekara nya ba timpuh ke semak tu,” ku iya.