NREB enggau JAS besaup matau penusah angus tanah kerapa di Miri
MIRI: Kaunsil Pengeraja Asal enggau Rampa Menua (NREB) Zon Utara Miri enggau Opis Rampa Menua (JAS) diatu benung matau enggau nyaga pengawa nunu di Kuala Baram.
Menteri Perengka Pengangkut Sarawak Datuk Lee Kim Shin madah, pengawa matau mesti dipejalaika laban Miri deka napi musim rangkai lalu nyeliahka ari nyadi penusah angus ba tanah kerapa ti tau ngujungka nyadi sebun asap di Miri.
“NREB nengah kerejasama enggau kompeni NAIM diatu benung chakah matau ngena dron kena nyidi orang ti bisi ngaga pengawa nunu,” ku iya.
ADUN Senadin madah munyi nya berindik ari penemuai Komiti Mutar Penusah Ngenyit Bagi Menua (JPBB) Miri ngagai Menara Tinjau Kuala Baram kena Hari
Minggu nyin tadi.
Iya ke mega Menteri megai tanggungpengawa ba JPBB Miri madah, sida agi berandauka strategi kena nyeliahka tanah kerapa nya angus, iya nya ngena dron.
Ku Lee, nengah pemadah ari Opis Meteorologi Miri, Miri diatu benung ba pengujung Monsun Timur Laut ti deka abis dalam bulan Mac.
Reti nya, Miri deka ngasaika musim rangkai iya nya nyingkang ngagai fasa Monsun Barat Daya ti deka nyadi ari bulan April nyentuk Mei.
“Kena nyeliahka ari fenomena sebun asap nyadi di Miri nya musim rangkai, JPBB Miri deka berengkah nyikap diri diatu, ke pemadu beguna iya nya matau enggau nyaga belama,” ku iya.
Ngena sentang pengawa matau enggau nyaga, Lee madahka baka ngelama tu,
NREB deka matau tetiap dua jam.
“Naka lemai ensanus ba Lot 3393, Lot 3709, Lot 4042, Lot 3711 enggau Pasar Baru Permyjaya, nadai pengawa nunu diripotka raban ti bejalaika pengawa matau, semina bisi tetemuka pengawa nunu mimit ba kebun, tang udah dipadamkan NREB enggaika nyerarai ngagai babas ke besemak enggau endur nya,” ku iya.
Ripot asil pengawa matau ngena dron naka 4.40 lemai ba hari ke sama, beratika semua endur manah magang.
“Pengawa matau majak dipejalaika tetiap dua jam nyentuk ke abis syif bekereja pukul 7 lemai.
“JPBB Miri minta kerejasama ari mensia mayuh kena nentuka Miri nadai kena tuntung penusah angus tanah kerapa enggau sebun asap,” ku iya.