GPS deka menang ba semua kerusi Bidayuh maya PRN12
Kebuah pia laban raban bansa Bidayuh nadai pilih bukai ti lebih manah kelimpah ngundi GPS, ku Manyin
Enti kitai semua ari sitak Bidayuh baka ari Opar, Tasik Biru, Serembu,Tarat, Kedup,Mambong, Bukit Semuja enggau Tebedu enda nyukung GPS tang nyadi penyakal, GPS tetap deka menang lalu numbuhka perintah.
Datuk Amar Michael Manyin Jawong
Mandal Presiden Kanan Parti Pesaka Bumiputera Bersatu (PBB)
LUNDU: Mandal Presiden Kanan Parti Pesaka Bumiputera Bersatu (PBB) Datuk Amar Michael Manyin Jawong pechaya, Gabungan Parti Sarawak (GPS) deka menang ba semua lapan kerusi Bidayuh maya Pengawa Bepilih Nengeri Ke-12 (PRN12) ila.
Berjaku ngagai pengarang berita pengudah nyuaka chek geran Projek Mit Pemansang Menua Pesisir (MRP) ungkup sitak N.1 Opar ba Balai Kampung Bitokan 1 ditu kemari, Manyin madahka raban bansa Bidayuh nadai pilih bukai ti lebih manah kelimpah ngundi GPS.
“Kitai bansa Bidayuh iya nya minoriti iaitu semina lapan peratus ari semua penyampau tubuh di nengeri tu.
“Enti kitai semua ari sitak Bidayuh baka ari Opar, Tasik Biru, Serembu, Tarat, Kedup, Mambong, Bukit Semuja enggau Tebedu enda nyukung GPS tang nyadi penyakal, GPS tetap deka menang lalu numbuhka perintah.
“Nya alai sapa ke deka rugi, agi Bidayuh. Nyadi minoriti kitai nadai pilih bukai lalu mesti dalam perintah,” ku iya.
Tambah Manyin ke mega Kaban Kunsil Nengeri Tebebu, bechuntoka sitak Opar ke ari baruh pegai penyakal, mar deka meri pemansang.
Nya alai ku iya, ba PRN ke deka datai, tentuka ngundi chalun GPS. Anang silap sereta anang milih bepelasarka gamal chalun tang peda logo GPS.
“Pintar bakani pan sesiku nya, tetap enda mudah enti ukai GPS. Nya alai ba PRN ila anang meda gamal chalun, tang peda mih lambang GPS.
“Enti Opar alah baru, sitak tu deka kediri lalu aku pechaya GPS deka numbuhka perintah baru nengah sukung penuh ari orang Melayu, Melanau enggau abis kurang 80 peratus ari sitak Dayak,” ku iya.
Dulu ari nya, Manyin ke mega Menteri Pelajar, Sains enggau Pansik Teknologi udah nyuaka 97 iti chek geran MRP ke beungkus RM1.2 juta ngagai pengari penerima ungkup sitak Opar.
Geran nya pemeri perintah nengeri ti udah dikemendarka Kepala Menteri, Datuk Patinggi Abang Johari ungkup pemansang ba sitak Opar.
Sama bisi maya nya, ADUN Tasik Biru Datuk Henry Harry Jinep enggau ADUN Serembu Miro Simuh, Pemesai Opis Pelilih Lundu ,Gustian Durani enggau ke bukai.