COVID-19: Sarawak ngerikod 139 kes baru, siti kes pemati
KUCHING: Sarawak ngerikodka 139 kes baru positif COVID-19 enggau bisi siti agi kes pemati baru ketegal rampit COVID-19 ti bekaul enggau siku lelaki beumur 85 taun.
Sapit Kepala Menteri Datuk Amar Douglas Uggah Embas madah, nya nyadika penyampau semua kes positif COVID-19 ba Sarawak nambah nyadi 10,063 kes enggau kes pemati ketegal COVID19 nambah nyadi 84 kes.
Sehari tu (kemari) bisi 139 kes positif baru COVID-19 ditemu ba Sarawak. Tu nyadika penyampau semua kes COVID-19 nambah nyadi 10,063 kes.
“Pelilih menua ti bisi ngerikotka kes baru tu (kemari) nyengkaum Pelilih Menua Sibu (39), Kuching (29), Bintulu (17), Betong (13), Kapit (6), Bau (6), Meradong (5), Miri (5), Selangau (5), Pusa (4), Serian (4), Sebauh (2), Julau (1), Sarikei (1), Asajaya (1) enggau Song (1).
“Sehari tu (kemari) mega bisi siti kes pemati baru ketegal rampit COVID-19 ti ngujungka penyampau kes pemati rampit COVID-19 nambah nyadi 84 iku,” ku iya ba aum pengarang berita COVID-19 Sarawak ti diatur ba Begunan DUN Lama ditu, kemari.
Bekaul enggau kes pemati baru iya nya kes ke-84 iya nya kes ke-8,350 siku lelaki peranak menua (Sarawak) beumur 85 taun ti diperubat ba Sepital Sibu laban ti sendat seput.
Peresa rT-PCR COVID-19 ti dipejalaika ba kes ditemu positif kena 23 Februari 2021.
Kes bisi kelai baka nadai nyium bau utai, enda masuk makai enggau batuk beberapa hari sebedau diperubatka ba sepital.
“Gaya pengerai kes majak enda manah sereta ditetapka udah nadai kena 1 Mac 2021. Kes bisi ko-morbid penyakit tungkul sengayuh kronik, darah tinggi, kemi manis enggau gout.
“Komiti Mutarka Penusah Ngenyit Nengeri Sarawak (JPBNS) meri penyinu ati ngagai sida ke sebilik enggau kes pemati,” ku Uggah ti mega Chairman JPBNS.
Nambahka nya Uggah ngeripotka kemari bisi 210 kes udah gerai sereta dikemendarka pansut ari Sepital Sibu (81), PKRC Hospital Kapit (52), Sepital Besai Sarawak (29), Sepital Bintulu (24), Sepital Sarikei (16) enggau Sepital Miri (8).
“Tu ngujungka penyampau semua kes positif COVId19 udah gerai sereta dikemendarka pansut ari sepital nambah nyadi 7,701iku tauka 76.53% ari penyampau semua kes COVID-19 ba Sarawak,” ku iya.
Kemari mega bisi 144 PUI baru udah diripotka sereta nadai PUI baru nganti pemutus peresa makmal.
Uggah bekaul enggau status pelilih menua ba Sarawak madah, dua pelilih menua ba nengeri tu pulai baru ngagai status Gadung berindik ari ti nadai ngerikodka kes baru.
Iya madahka tu nyadika penyampau semua pelilih menua dalam status Gadung nyadi 14 buah.
“Sehari tu (kemari), Pelilih Menua Lundu enggau Belaga udah pulai baru ngagai status Gadung pengudah nadai kes berampit ba dua pelilih menua tu diripotka dalam timpuh 14 hari ke udah.
“Nya alai diatu bisi 14 pelilih menua bestatus Gadung iya nya Tatau, Pakan, Matu,Lawas, Daro, Simunjan, Lubok Antu. Telang Usan, Limbang, Tanjung Masni, Tebedu, Kabong nyengkaum Lundu enggau Belaga,” ku iya.
Pelilih Menua Selangau, Kanowit, Betong, Meradong, Kuching, Samarahan, Kapit, Bintulu, Miri enggau Sibu agi ba status Mirah enggau penyampau semua 2,482 kes berampit diripotka ba 10 buah pelilih menua tu dalam timpuh 14 hari ke udah.
Pelilih Menua Julau, Subis, Bau, Bukit Mabong, Dalat enggau Sri Aman agi ba status Oren enggau penyampau semua 175 kes berampit ba pelilih menua tu diripotka dalam timpuh 14 hari ke udah.
Pelilih Menua Marudi,Mukah, Pusa, Song, Asajaya, Beluru, Sarikei, Saratok, Sebauh enggau Serian agi ba status Kuning enggau penyampau semua 94 kes ba pelilih menua tu diripotka dalam timpuh 14 hari ke udah.
Sama bisi ba aum pengarang berita, Direktor Opis Pengerai Nengeri Sarawak Dr Chin Zin Hing enggau Direktor Opis Imigresyen Nengeri Sarawak, Datu Ken Leben.