Sarawak begunaka sebuah CCRC ungkup orang indu
KUCHING: Sarawak begunaka sebuah palan Palan Mulaika Pemanah Ulah enggau Ngubat (CCRC) endur orang indu ke salah bekaul enggau salah nguna dadah ba nengeri tu.
Menteri Dagang Temuai, Seni enggau Main Asal Datuk Abdul Karim Rahman Hamzah madah, laban naka ke diatu orang indu ke salah bekaul enggau salah nguna dadah ti diasuh kort dianjung ngagai CCRC di Bachok, Kelantan .
“Ukai nya aja, CCRC iya nya palan ngagai (orang ke salah) ti dianjung nitihka peneka diri ba Batu 6 ditu, orang indu dipegulaika ba premis ti sama engga sida ke lelaki (blok bukai).
“Ba penemu aku nya enda patut nyadi tambah mega palan CCRC ti jauh, laban kitai nemu raban tu begunaka sukung diri sebilik.
“Nya alai kitai ngarapka perintah nengeri tauka perintah besai mansik pekara tu nengah chara numbuhka CCRC ungkup orang indu (orang ke salah nguna dadah),” ku iya ba aum pengarang berita ditu, kemari.
Iya ti mega Chairman Serakup Nagang Gian Dadah Malaysia (PEMADAM) Sarawak, dulu ari nya nyadi Chairman Aum Chairman Biro PEMADAM Sarawak ti digulu Chairman Biro Indu PEMADAM Sarawak, Datuk Sharifah Hasidah Sayeed Aman Ghazali.
Abdul Karim kelimpah ari nya mega minta perintah besai ngambika terus ngenyahka agi pengawa neritka adat ba garis entara menua enggau pintu penama ke nengeri tu, kena ngemuntanka pengawa mai tama dadah ke Sarawak.
Iya madah, mayuh kes tauka ripot sebedau tu madahka dadah udah dibai tama ke nengeri ngena kurier lalu nya ukai muntang alai meresa laban bungkus ke datai enda ulih dibuka sepeneka ati.
“Nya alai aku suah meri langgur penemu ngambika ditambahka agi unit K9, iya nya ukui penyidi ba pintu tama ke Sarawak laban aku dipadahka kitai semina bisi kurang ari 10 K9.
“Tang kitai chukup mayuh pintu penama ke patut dijaga kena nagang pengawa mai dadah tama.
“Ari kitai (perintah nengeri), kitai sedia nyendiaka ukui tu tang ari aspek perintah besai kitai patut bisi ejensi ti bejalaika, nyaga tauka ngelatih ukui penyidi tu,” ku iya.
Nitihku Abdul Karim kena ngelatih ukui penyidi , mega begunaka ungkus belanja ti besai ti abis kurang RM70,000 siku ukui.
Taja pia ku Abdul Karim, kena nagang penambah salah nguna dadah enggau nyadung dadah ke Sarawak, perintah patut berunding baka nambahka ungkup dikena numbuhka unit K9.