Penyampau orang ti ngelawa Pasar Sentral agi mimit

SIBU: Penyampau orang ti ngelawa Pasar Sentral ditu agi mimit taja pan udah dikemendarka beroperasyen baru kena 1 Mac tu tadi.

Enda ulih dikeenggaika, penyakit COVID-19 udah ngujungka mayuh raban orang ke bedaja napi pemar , laban asil ari dagang sida majak kurang.

Sekumbang Atur Nagang Pemindah (PKP 1.0) dipejalaika lebih dua bulan kenyau ari 18 Mac 2020, penatai pemisi 1,200 orang ke bejaja majak mimit laban mensia mayuh nyeliahka diri ari meli barang dia.

Opis Bekuasa Kandang Menua sekali agi nutup sementara Pasar Sentral lebih tiga minggu berngkah ari 8 Februari, kena nagang pengelekai COVID-19.

BAa pun Februari aja, 47 kes baru dirikodka ti ngujungka Kaunsil Mengeri Sibu (MPS) ngambi atur ngenyit kena nagang pengelekai virus tu.

Lebuh Pasar Sentral dibuka baru kena 1 Mac, mensia mayuh mengkah bedau sedia ngelawa palan nya laban irauka palan nya mengkang bedau selamat.

Siku orang ke nyual manuk ti udah disayat lebuh dirandau pagi kemari, nemu dagang majak nyadi mar agi PKP keterubah.

“Aku ngepunka dagang pagi tu maya hari besilih nitihka gintir ti ditetapka kaunsil.

“Aku udah melabaka penyampau orang ti datai bebeli nadai mayuh, nya alai aku mari beberapa iku manuk aja ke jual, iya nya kurang ari setengah enti di dibandingka hari bukai ke ngelama tu,” ku iya.

Ungkup minggu tu, iya bejual kena Hari Dua, Empat enggau Enam.

Minggu dbaru kena Hari Satu, Tiga enggau Lima.

Siku agi orang ke nyual manuk ke semina deka dikelala enggau nama Ling madah, manuk iya diatu semina dijual ngagai orang ti tumu minta galauka dulu.

“Aku enda mai mayuh manuk kitu laban irauka enda abis dijual.

“Nya alai orang ke deka meli mesti mesan dulu,” ku iya.

Siku penyual kuih, ti enggai madahka nama iya madah, taja pan iya melabaka nadai mayuh orang nurun ke pasar,tang iya mesti buka bansal alai iya bejual.

“Sekumbang tiga minggu ditutup, aku nadai bulih sesen pan penatai pemisi.

“Enti aku ngambi kemisi diatu, aku pan enda nemu nama pengawa deka digaga di rumah,” ku iya.

Kaunsil Mengeri Sibu, Clarence Ting madahka semina144 iku orang ke bedaja ari 1,116 (nyengkaum tamu enggau ke nyual pemakai) bejual ensanus.

Ku Ting, tebal agi orang ke bejual nya madahka dagang sida enda manah.

“Sekali tu SMC nyaga penyampau orang ke tama nengah tetiap pintu penama,” ku iya.