Terima tuchuk vaksin kena malas perintah
KUCHING: Perintah nyendiaka vaksin COVID-19 lalu rayat patut malas ngena chara ari peneka diri nerima tuchuk vaksin nya.
Menteri Muda Pengintu Pengelantang Pendiau Raban Bansa Datuk Francis Harden Hollis madah, laban tuchuk nya beguna amat kena ngenegapka imunisasyen tubuh ngelaban penyakit COVID-19.
Iya bepenemu, sukung rayat ti deka betuchuk vaksin nya ulih mantu mulaika pemanah pengidup baka selama enggau ekonomi menua ti meruan.
“Perintah diatu chukup ngemeratka pengelantang pendiau rayat nengah pengawa nyendiaka vaksin enda bebayar, lalu rayat patut malas nya nengah chara ari peneka diri dituchuk vaksin kena ngenegapka imunisasyen tubuh ngelaban penyakit COVID-19.
“Enti juluk tu ulih dijapai kitai amat ngarapka gaya pengidup kitai deka betambah manah lalu aktiviti ekonomi deka diangkat sereta ulih meri pengelantang pendiau ngagai rayat,” ku iya, ensanus.
Dulu ari nya Harden ti mega Kaban Kunsil Nengeri Simanggang bisi ngabas Palan Kuarantin enggau Perubat Mimit Berisiko COVID-19 (PKRC) Stadium Tetutup Perbadanan Sukan Negeri Sarawak di Sri Aman.
“Kitai beterima kasih ngagai sida pengatur pengawa Perbadanan Sukan Negeri Sarawak laban udah ngemendarka ngena stadium nyadi PKRC.
“Tu kena nangkup peminta guna nyadi wad alai ngubat COVID-19,” ku iya ke mega nyadi penyanding penemu Komiti Mutarka Penusah Ngenyit Bagi Menua Sri Aman ti mega enggau ngabas raban terabai menua sereta SOP ulih diteritka.
Penemuai Harden disempulang Residen Bagi Menua Sri Aman, ti mega nyadi Chairman Komiti Mutarka Penusah Ngenyit Bagi Menua Sri Aman, Indit Bangai sereta ke alai nya disambut Direktor Sepital Sri Aman Dr HAzwani Mohd Yusop enggau pengari Pemesai Pengerai Bagi Menua Dr Gwendolen Luciana Sylvester Gurang enggau sida ke bukai.
Nyerumba penemuai nya, Harden enggau raban iya mega bisi meri bantu pemakai rangkai enggau ai irup sereta siti ‘Water Dispenser’ ngambika bisi dikena raban terabai menua enggau pesakit ba PKRC Stadium Tetutup Perbadanan Sukan Negeri Sarawak di Sri Aman.
Nambahka nya, pengawa meresi tengah laman PKRC nya ti dipejalaika Opis Bomba Sri Aman ke nyadi bakih strategik Komiti Mutarka Penusah Ngenyit Bagi Menua Sri Aman.