10,801 iku udah dituchuk vaksin COVID-19 di Sarawak
KUCHING: Sepenyampau 10,801 udah dituchuk vaksin COVID-19 kenyau Program Imunisasi COVID-19 Nengeri Sarawak berengkah dipejalaika kena 26 Februari 2021.
Sapit Kepala Menteri, Datuk Amar Douglas Uggah Embas madahka atur pengawa meri vaksin renggat keterubah nya ba program imunisasi diberi ngagai raban terabai menua ba nengeri tu berengkah 26 Februari 2021.
Ku iya, kena 24 Februari 2021 sepenyampau 23,400 dos vaksin COVID-19 bansa Pfizer-BioNTech bisi diterima Opis Pengerai Nengeri Sarawak.
“Vaksin tu dianjung tauka disadung ngagai Bagi Menua Kuching, Samarahan, Serian, Sri Aman, Betong, Sarikei, Sibu, Kapit enggau Mukah berengkah 25 Februari 2021.
“Manakala Bahagian Bintulu, Miri enggau Limbang dipelaba deka nerima bekal vaksin kena 4 Mac 2021 (sehari tu).
“Naka 2 Mac 2021 penyampau semua ke udah dituchuk vaksin bisi sepenyampau 10,801 kenyau program imunisasi berengkah kena 26 Februari 2021,” ku iya.
Uggah ti mega Chairman Komiti Mutarka Penusah Ngenyit Nengeri Sarawak (JPBNS0 mansutka pekara nya ba aum pengarang berita COVID-19 ti diatur ba Bengunan DUN Lama ditu, kemari.
Ari penyampau nya (10,801 dituchuk vaksin) nyengkaum 10,037 iya nya raban staf pengerai enggau 764 iya nya ari ejensi tauka opis bukai.
Program Imunisasi COVID-19 Negeri sarawak dipenyadi Kepala Menteri Datuk Patinggi Abang Johari tun Openg kena 26 Februari 2021 ba Klinik Petra Jaya Kuching.
“Sehari tu kitai (Sarawak) nerima renggat kedua vaksin COVID-19 ti sepenyampau 31,590 dos. Dato Sri Dr Sim Kui Hian (Menteri Kaunsil Kandang Menua enggau Pengawa Berumah) ngemata sereta nerima penatai nya ba Padang Bilun Antarabansa Kuching (LTAK),” ku iya.