361 kes baru positif COVID-19 diripotka di Sarawak
KUCHING: Bisi 361 kes positif baru COVID-19 diripotka ba Sarawak sereta tebal agi kes baru nya ditemu ba Pelilih Menua Miri ti ngerikodka 89 kes ,kemari.
Sapit Kepala Menteri, Datuk Amar Douglas Uggah Embas madahka ari 361 kes positif baru ti ditemu nya nyengkaum ke diripotka ba Pelilih Menua Miri (89), Sibu (73), Bintulu (71), Betong (60), Kuching (22), Subis (11), Sarikei (9), Mukah (8), Kapit (6), Selangau (4), Serian (4), Meradong (3) enggau Julau (1).
Uggah ti mega Chairman komiti Mutarka Penusah Ngenyit Nengeri Sarawak (JPBNS) madah nya ngujungka penyampau semua kes COVID-19 ba Sarawak nambah nyadi 10,424 kes naka kemari.
“Ari penyampau semua 89 kes baru ti diripotka ba Pelilih Menua Miri iya nya nyengkaum 87 kes iya nya individu diperesa nengah pengawa nyidi kes engena chara aktif kontak kes positif COVID-19 enggau dua kes bukai beperesa COVID-19 ti datai ngagai palan pengerai pelilih menua tu.
“Bagi Menua Miri ngeripotka penyampau kes baru pemadu mayuh ba Sarawak kena 4 Mac 2021. Pelilih Menua Miri ngerikotka 89 kes lalu pelilih Menua Subis ngerikotka 11 kes.
“Bisi 49 iku ti ditemu ba Pelilih Miri iya nya ari Baram Oil and Gas Platform. Kluster tu nyadi ketegal bisi pekereja day-trippers ti enda nitihka SOP ke udah ditetapka sereta terdedah ngagai rampit COVID-19 ari kandang endur berisiko tinggi,” ku iya.
Iya madahka pekara nya ba aum pengarang berita COVID-19 Sarawak ti diatur ba Bengunan DUN Lama ditu, kemari.
Bejaku baru madahka komiti diatu benung bejalaika pansik bekaul kes tu iya nya kompeni enggau orang ke ngelanggar prosedur operasyen standard (SOP) nya deka sama dipansik.
“Enti ditemu salah enda nitihka SOP, individu enggau kompeni nya deka diukum. Tu nyadi amaran ngagai kitai sapa ti enda nitihka SOP deka betapi enggau tindakan.
“Laban ari kes ti baka tu dalam siti tim mayuh ti kena positif (COVID-19),” ku iya seraya madah kes tu benung dipansik.
‘Kes Indeks ditemu maya meresa survelan ti dipejalaika ngagai pekereja tiap 7 ngagai 10 hari.
Semua pekereja ti bisi risiko udah diperesa sereta dikuarantin ba palan kuarantin, lalu Platform nya mega udah diberesi tauka disanitasi.
Tebal agi kes bukai ti ditemu ba Pelilih Menua Miri enggau Subis kemari iya nya kontak ngagai kes positif enggau udah diserara ba palan kuarantin tauka kandang endur lockdown maya pemutus ditemu.
Nambahka nya lebuh ti ngenang gaya kes COVID19 ba Pelilih Menua Sibu ti ngerikotka 73 kes baru kemari, Uggah madahka, 55 peratus kes positif bekaul enggau tiga kandang endur iya nya Sibu Jaya, Sentosa enggau Tiong Hua.
Iya madahka 70 peratus ari kes ditemu nengah aktiviti nyidi kontak (ACD) lalu ari nya bisi 1,698 sampel udah diambi enggau 73 ari nya ditemu positif (penyampau positif 4.3 peratus).
Kelimpah ari nya lebuh ti ngenang kes ba Pelilih Menua Betong, Uggah madahka ari 60 kes positif baru ditemu kemari iya nya nyengkaum 58 kes bekaul enggau Kluster Jalan Muhibbah enggau dua kes individu ti diperesa nengah pengawa nyisi chara aktif kontak kes positif COVID19.
“40 kes ti diripotka ba Betong iya nya ti bekaul enggau sebuah rumah panjai ti udah dipejalaika lockdown tauka ditagang pansut enggau tama sepeneka ati.
“Lalu laluh iya sida benung dikuarantin ba palan kurantin laban sida ditemu tumu nyadi kontak semak ngagai kes positif.
“Tu nunjukka tebal agi kes positif sehari tu (kemari) benung dikuarantin enggau risiko ti baruh ngerampit orang bukai,” ku iya ti nyebut entara kes baru kemari.