RM30 juta disedia kena nyaup ngelempungka utang PTPTN
30 peratus laluh utang nembiak peranak Sarawak ke nginjau PTPTN dibayar Perintah Sarawak nengah Yayasan Sarawak (YS)
“Nengah kerejasama tu dikearapka ulih mantu mutarka isu utang ke bedau dibayar ti ditapi nembiak anak Sarawak ke bisi utang enggau PTPTN. ”
Datuk Patinggi Abang Johari Tun Openg
Kepala Menteri
KUCHING: Perintah Sarawak nengah Yayasan Sarawak (YS) udah nyendia sereta nyuaka ungkup belanja sepenyampau RM30 juta dikena mayar 30 peratus ari laluh utang nembiak peranak Sarawak ke nginjau duit Perbadanan Tabung Pendidikan Tinggi Nasional (PTPTN).
Kepala Menteri, Datuk Patinggi Abang Johari Tun Openg madahka kerejasama entara YS enggau PTPTN ti disain nengah Memorandum Pemereti Ati lebih ngagai isu mayar utang anak Sarawak ke udah mujur dalam pelajar, tang betapi enggau penanggul mayar utang.
Perintah Nengeri nengah Yayasan Sarawak nyuaka replika chek sepenyampau RM30 juta ti nguntungka nyentuk 9,000 iku nembiak ke patut pengudah disarap PTPTN.
“Nengah kerejasama tu dikearapka ulih mantu mutarka isu utang ke bedau dibayar ti ditapi nembiak anak Sarawak ke bisi utang enggau PTPTN.
“Aku ngarapka kerejasama tu ulih ngelempungka penanggul nembiak kitai anak Sarawak ba pengawa ngulihka pelajar ke manah.
“Tang kitai mega bisi prinsip, dalam Islam mega bisi prinsip, utang patut dibayar nadai utang ti enda dibayar, tu prinsip kitai. Aku ngarapka penginjau (nembiak) (enggau utai ti dipejalaika kitai tu) abis nadai ulih ngelempungka penanggul ti ditapi sida,” ku iya.
Abang Johari mansutka pekara nya ba atur pengawa iya ngemata seraya nyadi saksi ba Pengerami Besilih Memorandum Pemereti Ati entara Yayasan Sarawak enggau Perbadanan Tabung Pendidikan Tinggi Nasional ti diatur ba Wisma Bapa Malaysia ditu, kemari.
Abang Johari lebuh ke ngenang pasal kerejasama nyadi, bepun ari maya iya betemu enggau nembiak Sarawak di Semenanjung dalam program Lan Berambeh entara pemesai enggau anak Sarawak ke agi belajar ba Institusyen Pelajar Tinggi.
Ku iya, nembiak anak Sarawak maya sesi randau bisi mantaika sebana tauka penanggul ti bekaul enggau mayar utang sida ngagai PTPTN.
“Asil ari randau nya, aku madahka aku deka ngiga chara baka ni ulih ngelempungka penanggul sida bekaul enggau mayar utang tu.
“Nya kebuah aku udah ngungkupka belanja dalam bajet sepenyampau RM30 juta kena mutarka penanggul mayar utang ngagai PTPTN,” ku iya.
Dulu ari nya, Direktor Yayasan Sarawak Azmi Bujang bejaku madahka inisiatif tu kena mantu nembiak anak Sarawak ke nginjau duit PTPTN.
Yayasan Sarawak diberi tanggungpengawa bejalaika inisiatif baka ti dipadahka Kepala Menteri kena 18 Januari 2021.
“Inisiatif tu semina ungkup nembiak ke patut iya nya ke udah mayar abis kurang 30 peratus ari penyampau ke diinjau sida ba PTPTN , lalu Yayasan deka mayar 30 peratus ari laluh ke diinjau nya.
“Yayasan Sarawak ngarapka nembiak ke patut nerima inisiatif tu ulih majak mayar duit injau sida ngagai PTPTN,” ku iya.
Berebak enggau tu mega, Ketuai Eksekutif PTPTN Ahmad Dasuki Abdul Majid lebuh bejaku muji inisiatif ti dipejalaika Perintah Sarawak kena mantu nembiak anak nengeri tu.
Iya madahka atur tauka pemutus ti dipejalaika Perintah Sarawak, patut tau nyadi teladan ngagai nengeri bukai ba pengawa mayar laluh utang ngagai PTPTN, kelebih agi diatu rayat tekeruga ketegal pandemik COVID-19.
“Inisiatif Perintah Sarawak tu pengawa ti proaktif laban semina sebuah perintah nengeri ti bejalaika inisiatif tu ngena ungkup belanja ti chukup besai,” ku iya seraya ngarapka inisiatif tu ulih ngurangka penanggul belanja nembiak anak Sarawak.
Sama datai ngemataka pengerami nya, Sapit Sekretari Perintah Nengeri (Transformasyen Sosio Ekonomi) Dato Sri Muhamad Abu Bakar Marzuki, Sapit Sekretari Perintah Nengeri (Transformasi Prestasi dan Penyampaian Perkhidmatan ) Datu Dr Sabariah Putit enggau Ketuai Pemesai Operasyen PTPTN Mastura Mohd Khalid.