Ketegal enda sepenemu pengawa nyiri KK, KM China ditangguh
SIBU: Pemuntan parti komponen Gabungan Parti Sarawak (GPS) sepenemu udah ngujungka pengawa nyiri ketuai bansa (KK) enggau ketuai raban bansa (KM) China ditu ditangguh nyentuk ke diatu.
Presiden Parti Sarawak Bersatu (PSB) Dato Sri Wong Soon Koh madah, ketegal nangguhka nya udah sistem gawa ke raban bansa ti begunaka nya ditu enda ulih dipejalaika.
“Ketegal pemuntan komponen parti GPS sepenemu, udah ngujungka urung 40 iku ketuai bansa China di Sibu kelebih agi kapitan enggau penghulu bedau dichiri,” ku iya ba sebengkah aum media ba Opis PSB Bawang Assan, ensanus.
Seraya mandangka surat berita China bekaul isu nyiri nya, Wong ke mega ADUN Bawang Assan deka ke Opis Residen enggau Opis Pelilih Menua jampat agi mutarka pekara nya.
“Enti Residen enda ulih mutarka pekara tu, aku minta Temenggong mantu meda lalu ngenyampatka proses nyiri ketuai bansa China di Sibu,” ku iya.
Ku Wong, tebal agi kapitan enggau penghulu bansa China di Sibu udah abis timpuh gawa kena 31 Disember 2020.
“Diatu udah masuk bulan ketiga pengawa nyiri ketua bansa tu bedau diputarka. Laban sekula deka dibuka enda lama agi, ramai apai indai begunaka bantu ketuai bansa ngambika ngenuku pom enggau ke bukai.
“Tang diatu sida napi penanggul laban ketuai bansa nya udah abis timpuh kereja sereta enda bejalaika pengawa sida agi,” ku iya.
Kelimpah ari nya, Wong mega deka ke pengawa nyiri ketuai bansa enggau ketuai raban bansa ukai semina ba kaban parti politik aja, tang digaga enggau chara tebuka.
Pengawa milih chalun ku iya, ukai mesti ari ketuai parti tauka kaban parti, tang mega ari raban orang ke chakah gawa ke rabaan bansa tauka ngarika komuniti.
“Kitai bisi mayuh chalun ti chakah sereta amat deka gawa ke raban bansa di luar din, ti patut diberi peluang mangku pengawa nya,” ku iya nyemetak.