Pasar Tamu Baru Sri Aman berengkah dibuka baru kemari
KUCHING: Pasar Tamu Baru Sri Aman di Sri Aman dikemendarka dibuka baru ngagai mensia mayuh berengkah kemari, 5 Mac 2021.
Menteri Muda Pengelantang Pendiau Mensia mayuh ti mega Kaban Kunsil Nengeri Simanggang Datuk Francis Harden Hollis madah, taja pia orang dagang enggau mensia mayuh ti bebelika barang ba pasar tamu nya patut nitihka prosedur operasyen standard (SOP) ke udah ditetapka kena nagang pandemik COVID19.
Iya madahka tanggungpengawa nentuka SOP nya dititihka ari baruh kuasa Majlis Daerah Sri Aman (MDSA) sereta orang dagang enggau mensia mayuh ke bebelika barang, patut nitih enggau terit baka meresa pengangat tubuh, ngerejista ba aplikasyen MySejahtera tauka nulis nama ba bup ti bisi disediaka Majlis.
“Atur nentuka SOP dititihka terit ba Pasar Tamu ari baruh tanggungpengawa opis kaunsil kandang menua ti meri perintah ngagai semua orang dagang enggau mensia mayuh ke bebelika barang ditu.
“Jalai tama enggau pansut patut disediaka sereta jalai ti enda dikemendarka ditengah patut dilikang tauka digaga pagar ti meruan.
“Majlis (MDSA) mega tau berandau enggau Komiti Mutarka Penusah Ngenyit Bagi Menua (JPBB) enti deka ngena servis RELA nyaga enggau bejalaika pengawa matau pengulih nitihka SOP COVID-19,” ku iya kemari seraya madah semua atur SOP nya norma tauka chara baru dalam aktiviti dagang.
Harden kemari ningkilka Notis Nutup pasar tamu baru
Sri Aman nya, ti nyadi kelai aktiviti dagang berengkah baru sereta sedia nerima mensia mayuh datai bebeli barang.
Sebedau tu, Pasar Tamu Baru Sri Aman ditutup sementara 10 hari (25 Februari 2021 ngagai 5 Mac 2021) berindik ari bisi kes positif COVID-19 ditemu maya meresa 184 iku orang dagang enggau orang ke datai bebelika barang ngagai tamu nya, lalu asil ari pengawa meresa nya, ditemu tiga iku positif.
Berengkah kemari, pasar tamu nya dibuka baru nitihka pemendar ari Opis Menteri Pengerai Malaysia (KKM).
Sama bisi datai Tuai Kunsil MDSA Anthony Abell Chendan, Sekretari MDSA Tay Guan Huat, Pemesai Pengerai Rampa Menua Opis Pengerai Bagi Menua Sri Aman, Phang Soon Yien enggau bala bukai.