Tujuh ketuai raban bansa di Sri Aman udah nerima surat chiri
KUCHING: Bisi tujuh iku tuai raban bansa ba Sri Aman nerima surat chiri ketuai raban bansa ti disuaka Menteri Muda Pengelantang Pendiau Raban Bansa Datuk Francis Harden Hollis.
Ari tujuh iku nya bisi empat iku baru dichirika iya nya Kapitan Goh Teo Soon ti nyaga komuniti China, Batu Lintang, Undop, Sri Aman; Tuai Rumah (Tr) James Tekat Ranggie (Genturung Pendiau Nanga Skrang Ili, Sri Aman); Tr Nanta Basi (Genturung Pendiau Purai, Undop, Sri Aman) enggau Ketua Kaum (KK) Shaibi Bakir (Genturung Pendiau Muhibbah, Zon Selatan, Sri
Aman).
Lalu tiga iku agi disambung pengawa nyadi tuai raban bansa iya nya Tr Charli Ata (Genturung Pendiau Pruan A, Sri Aman); Tr Empol Melintang (Genturung Pendiau Sungai Tenggak C, Undop, Sri Aman enggau KK Sharkawi Morshidi (Genturung Pendiau Muhibbah, Zon Tengah, Sri Aman).
Lebuh bejaku ba atur program nyuaka surat nyiri nya, Harden ngarapka tuai raban bansa nyukung polisi perintah.
“Perintah Gabungan Parti Sarawak (GPS) ngaku, ngeluarka setipikit sereta mayar elawin baka ti ditulis dalam setipikit nya.
“Tuai raban bansa nyadi jematan tauka penyambung entara rayat enggau perintah,” ku iya seraya ngingatka anang disema baka kitai meri makai tang jari kitai diketup.
Berebak enggau tu Pemesai Pelilih Menua Sri Aman Mohd Ashree Wee ngarapka bala tuai raban bansa bejalaika tanggungpengawa enggau manah kena nentuka pemansang rayat sereta genturung pendiau tauka rumah panjai ke dijaga.
Tuai raban bansa mega patut ulih meretika aspirasyen perintah diatu ti benung chakah mai pemansang, ku iya.
“Tuai raban bansa ti dichirika patut pandai berunding kuing enggau juluk genturung pendiau ke dipegai diri. Aspirasi perintah ke diatu ti chakah bejalaika pemansang mega patut ulih diperetika tuai raban bansa,” ku iya.
Sama bisi ba atur pengawa nya, Pegawai Tadbir, Opis Pelilih Menua Sri Aman, Tuai Raban Bansa Iban Kandang Endur Batu Lintang, Undop, Sri Aman, Penghulu Mingging Sigan sereta Sapit Walikota Majlis Daerah Sri Aman Cr Andar Suntai.