Projek Jejantas ti nyambung Jalai Kubu ke TTBM deka tembu ujung taun 2022: Dr Abdul Rahman
LIMBANG: Projek Jejantas penyauh 400 meter ti nyambung Jalai Kubu ke Taman Tasik Bukit Mas (TTBM) beungkus RM4.5 juta entara siti agi projek ikonik ngagai pelilih menua Limbang lebuh nya tembu ba pengujung taun 2022.
Menteri Muda Betanam Betupi Moden, Tanah Adat enggau Pemansang Kandang Menua Sarawak Datuk Dr Abdul Rahman Ismail madah, projek tu siti agi perengkaguna ungkup orang ti bejalai kaki ari
Tebing Sungai Limbang nuju ke TTBM.
“Projek tu endang beguna laban ti nyambungka TTBM ke Tebing Sungai Limbang lalu enda ibuh meraka jalai alun.
Nyema projek tu tembu jemah ila deka ulih nyamin pengelikun mensia mayuh ti bejalai kaki lalu enda ibuh meraka jalai alun kelebih agi di kandang menua nya,” ku iya lebuh ti ditemu pengarang berita maya pengawa nyuaka surat projek ngagai kunteriktor kemari.
Sama bisi enggau iya nya Tuai Kaunsil Opis Kaunsil Pelilih Menua Limbang (MDL) Kunsilor Sufian Mohat sereta pengari Sekretari MDL Mohammad Syamil Jumain.
Kaban Kunsil Nengeri (ADUN) Bukit Kota nya mega madah, jejantas tu deka nyadi kelai ti narit ati ba Limbang enggau gaya langkar ti manah.
“Perengkaguna tu endang beguna ungkup pejalai kaki ti deka meda pemanah rampa menua mengeri Limbang lalu terus ngaga pengawa rekreasyen ngagai TTBM kelimpah ulih ngasaika prasarana dagang temuai ke endang udah bisi ti besemak enggau Muzium Kandang Menua Limbang sereta Muzium Pemansang Administrasyen Limbang,” ku iya nambah.
Ku iya nambah agi, perengkaguna tu endang manah kena nyungkak aktiviti rama, ekonomi sereta dagang temuai ba mengeri Limbang.