Padamka utang PTPTN nembiak ari ruang bilik penatai pemisi mit: TSI
Opis menteri tau ngelancharka program kena ngelala raban nembiak ungkup tuju nya
KUCHING: The Sarawak Initiative (TSI) meri langgur penemu ngagai perintah nengah Opis Menteri Pelajar Tinggi (KPT) ngambika madamka 100 peratus utang nembiak ti datai ari ruang bilik ke penatai pemisi mit.
“
Taja pia, nembiak ke udah graduet sereta udah bisi kereja ke manah lalu ngembuan penatai pemisi ke besai, mesti mayar duit
” injau sida nya.
Datuk John Tenewi
Chairman The Sarawak Initiative (TSI)
Chairman TSI Datuk John Tenewi madah, opis menteri engka tau ngelancharka program kena ngelala raban nembiak ungkup tuju nya.
“Taja pia, nembiak ke udah graduet sereta udah bisi kereja ke manah lalu ngembuan penatai pemisi ke besai, mesti mayar duit injau sida nya.
“Kami (TSI) mega minta Yayasan Sarawak (YS) berunding mayar ka duit injau nembiak ke ari raban penatai pemisi mit sereta bisi penanggul ba pekara wang,” ku iya nengah penerang media kena Hari Dua.
Ku iya, sida nyambut manah atur perintah Sarawak nengah YS ti mantu mayar laluh duit injau 30 peratus nembiak ngagai Perbadanan Tabung Pendidikan Tinggi Nasional (PTPTN).
Tang, iya pechaya mayuh utai ke tau digaga kena mantu nembiak ari ruang bilik ke bepenatai pemisi mit ti bebendar mayar duit injau nya, kelimpah nanggung belanja ruang bilik sida.
Madamka bayar utang nembiak nya ku iya, deka mantu ekonomi ruang bilik ari raban nya laban sida tau ngena duit ke kena mayar utang nya meli barang ke diguna enggau servis bukai dalam ekonomi sida.
Nengah chara nya ku John, nya mega nyaup ngedutka seraka bida ba penatai pemisi ti majak nyadi di menua kitai.
Sida ti ari raban ke kaya deka mayar duit injau nya lalu nembiak ari raban ke penatai pemisi mit deka diberi bantu wang ngambika sida enda tinggal bulih pelajar ke manah.
Nya alai, TSI meri langgur penemu ngambika program mayar duit injau tu nagit raban ke penatai pemisi mit sereta napi pemar mayar duit injau sida,” ku iya.