PSB numbuhka tim pengereja pengawa Zon Selatan kena mutarka penanggul ditapi komuniti
KUCHING: Parti Sarawak Bersatu (PSB) kemari numbuhka siti tim pengereja pengawa Zon Selatan kena mutarka isu enggau penanggul ti ditapi komuniti di mengeri besai tu.
Presiden PSB, Dato Sri Wong Soon Koh madahka tim nya ditumbuhka kena ngiga chara mutar isu enggau penanggul ti dibantaika mensia mayuh di menua pesisir lalu tim ke sama mega deka ditumbuhka ba Zon Tengah enggau Zon Utara nengeri tu.
“Tim pengereja pengawa tu deka betuaika Yang Berhormat See Chee How (Kaban Kunsil Nengeri Batu Lintang) ba semua inisiatif.
“Aku pechaya ngena semua peneleba iya dalam politik ngelama tu, iya ulih megai tanggungpengawa tu. Iya individu ke pemadu engkeman ngiring tim pengereja pengawa tu,” ku iya maya aum media ba indu opis PSB ditu, kemari.
Ku Wong, tim nya mega diarika raban profesional ari bemacham bidang ti deka bejalaika pansik sentang isu ke ditapi mensia mayuh, ti deka dipadah ngagai parti ngambi diputarka.
Ku iya, tim pengereja pengawa zon Selatan deka bepangkalan di Kuching lalu Zon Tengah bepangkalan di Sibu lalu Utara di Miri.
“Semua tim pengereja pengawa ba zon tu udah bisi raban lalu sehari tu aku ngelancharka ungkup zon Selatan ti deka ditangkanka enggau zon tengah enggau zon utara ila,” ku iya.
Berebak enggau nya, See ke mega Kaban Kaunsil Tetinggi Presiden PSB madah, tim pengereja pengawa ti ditumbuhka nya deka ngatur siti siri ‘Dialog Awam’ enda lama agi ti deka ngelaluka penatai mensia mayuh enggau profesional ke bukai ngambika meri penemu sentang penanggul ke ditapi.
“Sesi Dialog Awam tu deka mungkur bemacham topik baka pelajar, ekonomi, penanggul pejalai trafik, pemansang infrastruktur kelimpah penanggul ari baruh opis kaunsil kandang menua,” ku iya.
Sekretari Besai PSB, George Lo ba aum media ke sama mega madahka parti deka numbuhka tim pengereja pengawa ke sama ungkup menua pesisir laban penanggul ke ditapi komuniti di mengeri enggau menua pesisir bebida.
“Ukai semua isu dalam kandang zon nya sebaka. Nya alai ba renggat zon mega kami numbuhka siti komiti ke nyaga sitak Kunsil Nengeri (DUN) ke alai sida deka mantaika penanggul nya ngagai tim pengereja pengawa sida empu,” ku iya.
Ditanya sentang chalun ti tau nyadi kepala menteri nyema PSB menang majoriti kerusi ba pengawa bepilih nengeri ke deka datai, Lo madahka nya deka dipadah enti udah datai ba maya iya.
“Aku pechaya semua pengari rayat ke dipilih deka ngaga pemutus ke betul lebuh milih kepala menteri (enti PSB ulih numbangka perintah ke diatu),” ku iya.