Dua kluster baru ditetapka bisi di nengeri
KUCHING: Kluster Melor, Pusa ditetap nyadi siti agi kluster baru COVID-19 di nengeri tu.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah, kluster baru nya ditetapka Opis Pengerai Nengeri Sarawak (JKNS) kemari.
"Kluster Melor iya nya kluster komuniti ti ditemu ba Lurung Melor di Kampung Beladin dalam Pelilih Menua Pusa, Sarawak.
"Indeks kes kluster tu iya nya siku indu peranak menua (Sarawak) beumur 23 taun ti ditemu ari pengawa meresa individu bisi kelai kena 24 Februari 2021.
"Asil ari pengawa nyidi enggau meresa semua kontak semak kes indeks tu, nambah 13 kes positif COVID-19 ti udah ditemu. Tu berampit dipelaba maya pengawa begulai enggau aktiviti 'solat berjemaah' dalam surau ba genturung pendiau nya," ku JPBNS, kemari.
Nitihku JPBNS, naka 10 Mac 2021 bisi 335 individu udah diperesa nyengkaum 14 kes udah ditemu positif COVID-19 nyengkaum indkes kes; 30 individu negatif enggau 20 individu agi nganti pemutus.
Enggau penambah siti kluster baru kemari, ngujungka penyampau kluster COVID-19 ke agi aktif bisi 27 kluster.
Ari semua penyampau nya (27) bisi enam kluster nambah kes lalu 21 kluster ke bukai nadai nambah kes.
Kelimpah ari Kluster Melor, Pusa, entara kluster ke bisi nambah naka kemari iya nya Kluster Buloh, Selangau bisi 35 kes, Kluster jalan Muhibbah, Betong (268 kes); Kluster Emperoh Jambu, Kuching (262 kes); Kluster Jalan Green, Kuching (30 kes) enggau
Kluster Gelong, Kapit bisi 236 kes.
Kluster aktif bukai ke nadai nambah kes kemari iya nya Kluster Jalan Awang, Sibu; Kluster Bukit Tunggal, Julau; Kluster Jalan Ho Pin, Samarahan; Kluster Sungai Bakong, Meradong; Kluster Kampung Sungai Maong, Kuching; Kluster Kejatau, Sri Aman; Kluster Jan Yong, Kapit; Kluster Geronggang, Sibu; Kluster Mas Merah, Sibu;
Nambahka nya Kluster Univista, Samarahan; Kluster Kidurong Dua, Bintulu; Kluster Nanga Lijan, Julau; Kluster Seruas, Beluru; Kluster Sebangkoi, Sri Aman; Kluster Jun Heng, Bintulu; Kluster Bintang Daily, Meradong; Kluster Jalan Pengiran, Matu; Kluster Tabong, Bau; Kluster Rakut, Miri; Kluster Pasai, Sibu enggau Sub-Kluster Tangap (Subis) nadai nambah kes.