Bau enggau Serian kemari betukar nyadi status Mirah

KUCHING: Pelilih Menua Bau enggau Serian kemari betukar nyadi status Mirah COVID-19.

Sekretarit Komiti Mutarka Penusah Ngenyit Nengeri Sarawak (JPBNS) madah nya nyadika penyampau semua pelilih menua ba status Mirah COVID-19 bisi 12 buah pelilih menua.

"Pelilih Menua Bau enggau Pelilih Menua Serian udah betukar ari status Oren ngagai status Mirah pengudah ngerikodka sepenyampau 41 (Pelilih Menua Bau) enggau 42 (Pelilih Menua Serian) kes berampit ba pelilih menua tu dalam timpuh 14 hari ke udah.

"Pelilih Menua Subis,

Julau, Selangau, Betong, Meradong, Kuching, Kapit, Bintulu, Miri enggau Sibu agi ba status Mirah enggau penyampau 2,604 kes berampit diripotka ba 10 pelilih menua tu dalam timpuh 14 hari ke udah.

"Sehari tu mega , Pelilih Menua Samarahan enggau Pelilih Menua Song udah betukar status ari Kuning ngagai status Oren pengudah ngerikodka 21 (Pelilih Menua Samarahan) enggau 23 (Pelilih Menua Song) kes berampit ba pelilih menua tu dalam timpuh 14 hari ke udah," ku JPBNS nengah penerang berita, kemari.

Nambahka nya, JPBNS ngeripotka Pelilih Menua Kanowit, Sarikei, Dalat enggau Sri Aman agi ba status Oren enggau penyampau semua 100 kes berampit ba pelilih menua tu diripotka dalam timpuh 14 hari ke udah.

Kelimpah ari nya Pelilih Menua Belaga, Lundu, Bukit Mabong, Tatau, Marudi, Mukah, Pusa, Asajaya, Beluru, Saratok enggau Sebauhagi ba status Kuning enggau penyampau semua 96 kes berampit ba pelilih menua tu diripotka dalam timpuh 14 hari ke udah.

"Lalu 11 pelilih menua (Pakan, Matu, Lawas, Daro, Simunjan, Lubok Antu, Telang Usan, Limbang, Tanjung Manis, Tebedu enggau Kabong) agi ba status Gadung," ku JPBNS.