Penyampat JBALB mutarka penanggul suntuk ai di sitak Sibuti patut dipuji
MIRI: Penyampat Opis Bekal Ai Menua Pesisir (JBALB) nganjung ai beresi ngagai sekeda beberapa rumah panjai di Sibuti patut dipuji, laban pengudah sida nerima sebana ari peranak rumah panjai nya ti amat beguna bantu nya.
Ketuai Indu Parti Keadilan Rakyat (PKR) Pampang Sibuti, Zulhaidah Suboh ngaku iya ngenataika sebana nya ngagai JBALB pengudah dipadah peranak rumah panjai bekaul penanggul suntuk ai.
"Terima kasih ngagai JBALB lalu peranak menua nya gaga amat ati laban sida jampat nganjung ai kena mutarka penanggul ai beresi ke ditapi sida.
"Taja pan agi bisi kandang menua ti mengkang nadai ai kenyau seminggu ke udah berindik ari pengawa ngaga projek Jalai Pan Borneo,"ku iya madah ngagai Utusan Borneo ditu, ensanus.
"Dalam situasyen rayat betapi enggau krisis pengerai enggau pandemik COVID19, peranak menua pesisir ti nadai perengkaguna tu patut dikemeratka kelebih agi laban sida patut betapi enggau norma baru pengidup, lalu pemeresi mega patut dikemeratka tetiap individu enggau ruang bilik sida," ku iya.
Ku Zulhaidah baru, maya musim panas ke deka ditapi ba maya ke diatu, ukai semina bekala ai beresi ari JBALB tang LAKU Management mega patut harus sama mekalka ai beresi ngagai peranak baka ba Kampung Tukau Usahajaya/Kampung Tukau.
Baka nya mega opis bukai ke bekaul nyengkaum Opis Pengintu Pengelantang Pendiau (JKM) ti megai tanggungpengawa mekalka ai irup ke chukup ngagai peranak di menua pesisir enggau genturung pendiau ke agi tinggal pemansang nadai perengkaguna, kena sida ngidupka diri ninting hari, kelebih agi kena orang indu ngadu ka ruang bilik sida enggau nembiak mit.
"Aku mega minta opis ke bekaul mekalka ai beresi enggau ai irup ke diberi nengah chara ninting buluan ngagai peranak rumah panjai enggau genturung pendiau ti nadai perengkaguna nya.
"Tu endang tanggungpengawa perinytah ke patut ditanggung sekumbang ke nganti penanggul ai menua pesisir diputarka," ku iya.
Ku iya baru, isu perengkaguna ke baka nya mesti diputarka perintah nengeri enggau perintah besai enggau jampat.
Ku iya, nyauka 58 taun rayat Sibuti enggau rayat Sarawak,agi bisi ti bedau ngasaika perengkaguna nya magang.
"Tu siti pemuntan ngatur pengawa perintah BN ke diatu dikelala enggau nama perintah GPS.
"Aku mega ngansak perintah nengeri mutarka isu meter paip ti udah dilekatka ba rumah panjai tang nadai ai," ku iya.