ADUN tau ngena agih belanja RTP melanja Projek Jiwa Murni
GEDONG: Kaban Kunsil Nengeri (ADUN) Sarawak tau ngena agi belanja Projek Transformasyen Menua Pesisir (RTP) sida, kena melanja projek Jiwa Murni Angkatan Tentera ba sitak DUN sida empu, pia ku Kepala Menteri Datuk Patinggi Abang Johari Tun Openg.
Ku iya tetiap iku ADUN Sarawak diungkupka RM5 juta setaun kena bejalaika RTP ba sitak DUN sida empu.
Seraya muji upengawa Soldadu Darat Malaysia (TDM) ngaga projek jiwa murni taun tu ti bepalan ba sitak Kunsil Nengeri (DUN) Gedong enggau Simunjan dalam sitak parlimen Batang Sadong, iya setuju enti TDM ulih ngerembaika program nya ngagai sitak bukai.
Abang Johari nejaku munyi nya ngagai pengarang berita oengudah bejadi Pengerami Ngelancharka Projek Jiwa Murni Renggat Parlimen Batang Sadong, ke mungkur DUN Gedong, Simunjan enggau Sadong Jaya ditu, kemari.
Ku iya, iya udah berandau enggau Panglima Soldadu Darat Jeneral Tan Sri Zamrose Mohd Zain sentang nya lalu perintah nengeri setuju nyendiaka agih belanja RTP ke tuju nya.
“Saya meda projek jiwa murni tu ngasi amat kena nulung rayat ti enda ulih nyeruri rumah, ngintu rumah jalai pengarap enggau meresika pendam,” ku Abang Johari.
Program Jiwa Murni renggat Batang Sadong nya mungkur 21 projek ngena agih belanja RM1.5 juta ari perintah nengeri, lalu udah berengkah dipejalaika kena 15 Februari sereta dipelaba tembu digaga ujung bulan April taun tu.
Dulu ari nya lebuh ke bejaku, iya madahka kuing ekonomi enggau pelin ekonomi pengudah pandemik COVID-19 endang kena muka peluang ekonomi enggau pengawa puang ungkupi rayat Sarawak.
“Nengah pengelikun enggau pengelantang ti diasaika kitai maya ke diatu asil ari pengawa raban soldadu enggau polis, nya udah ngujungka perintah enggau rayat tau fokus ngagaiu pemansang enggau ekonomi nengeri tu,” ku iya.
Berebak enggau nya, Zamrose lebuh ke bejaku meri terima kasih ngagai perintah nengeri laban nyendiaka agih belanja kena ngemujurka projek ti diperambu. — Bernama